متحدہ عرب امارات کا اوپیک کے منظور شدہ اضافی رضاکارانہ پیداوار ایڈجسٹمنٹ پر مکمل عملدرآمد کےعزم کا اظہار

ویانا۔4مارچ (اے پی پی):متحدہ عرب امارات نے اوپیک کے منظور شدہ اضافی رضاکارانہ پیداوار ایڈجسٹمنٹ پر مکمل عملدرآمد کےعز م کا اظہار کیا ہے۔امارات نیوز ایجنسی وام کے مطابق ا وپیک پلس کے آٹھ ممالک، جنہوں نے اپریل اور نومبر 2023 میں اضافی رضاکارانہ پیداوار میں کمی کا اعلان کیا تھا، نے آج عالمی مارکیٹ کے حالات اور مستقبل کے امکانات کا جائزہ لینے کے لیے ایک ورچوئل اجلاس منعقد کیا۔

ان ممالک میں سعودی عرب، روس، عراق، متحدہ عرب امارات، کویت، قازقستان، الجزائر اور عمان شامل ہیں۔اوپیک کے جاری کردہ بیان کے مطابق، مارکیٹ کے مثبت رجحانات اور مضبوط معاشی عوامل کو مدنظر رکھتے ہوئے، ان ممالک نے 5 دسمبر 2024 کو طے شدہ فیصلے کی توثیق کی، جس کے تحت یکم اپریل 2025 سے 2.2 ملین بیرل یومیہ رضاکارانہ ایڈجسٹمنٹ کو تدریجی اور لچکدار طریقے سے بحال کیا جائے گا۔

اجلاس میں اس بات پر زور دیا گیا کہ یہ تدریجی اضافہ مارکیٹ کی صورتحال کے مطابق روکا یا پلٹا بھی جا سکتا ہے، تاکہ تیل کی عالمی منڈی میں استحکام برقرار رکھا جا سکے۔ان آٹھ ممالک نےاس بات کا اعادہ کیا کہ وہ 3 اپریل 2024 کو منعقدہ 53ویں جے ایم ایم سی اجلاس میں طے شدہ اضافی رضاکارانہ پیداوار ایڈجسٹمنٹ کے مکمل نفاذ کے پابند رہیں گے۔

اجلاس میں اس امر کی بھی تصدیق کی گئی کہ تمام اضافی پیدا شدہ حجم، جنوری 2024 سے اب تک کی مدت میں، مکمل طور پر 30 جون 2026 تک پورے کیے جائیں گے۔اس کے علاوہ، متعلقہ ممالک نے اس بات پر اتفاق کیا کہ وہ اپنے اضافی پیداوار کی تلافی کے منصوبے کو پہلے مراحل میں مکمل کریں گے، تاکہ زیادہ سے زیادہ اضافی پیداوار کی تلافی ابتدائی مہینوں میں ہو سکے۔یہ ممالک 17 مارچ 2025 تک اپنے اپڈیٹ شدہ تلافی منصوبے اوپیک سیکرٹریٹ میں جمع کرائیں گے، جسے بعد ازاں اوپیک کی ویب سائٹ پر شائع کیا جائے گا۔