پاکستان میں اقلیتوں کو مکمل آزادی حاصل ہے ، رمیش سنگھ اروڑا

شیخوپورہ۔ 06 مارچ (اے پی پی):صوبائی وزیر اقلیتی امور رمیش سنگھ اروڑا نے کہا ہے کہ پاکستان میں اقلیتوں کو مکمل آزادی حاصل ہے وزیر اعلیٰ پنجاب مریم نواز نے اقلیتوں کی عبادت گاہوں کی تزئین و آرائش کیلئے خصوصی فنڈز مختص کئے ہیں جن میں امسال دو فیصد اضافہ کیا گیا ہے پاکستان بنانے اور اس کی تعمیر و ترقی میں اقلیتوں کا کردار کلید ی ہے جو ہمارے ماتھے کا جھومر ہیں پاکستان ایک پھولوں کے ایک گلدستے کی مانند ہے جس کے تمام پھول اپنی اپنی مہک رکھتے ہیں۔ ان خیالات کا اظہار انہوں نے یونائٹیڈ پریئر فیسٹیول میں بطور مہمان خصوصی شرکت کے موقع پر خطاب کرتے ہوئے کیا۔

فیسٹیول میں ملک و بیرون ملک سے آئے مسیحی برادری کے رہنماؤں نے شرکت کی۔اس موقع پر بیرون ملک سے آئے مسیحی نمائندوں پاسٹر اوینڈرس جون اور مسٹر کیرک نے خصوصی فنڈز دینے کا اعلان کیا، فیسٹیول کے میزبان القاس اللہ غازی نے وسیم سنی بھٹی، اشفاق غوری، ارشد پرویز، عدنان سلیم، ایلڈر سلیم گل، عابد بھٹی، پاسٹر اسلم غوری، خالد شیر کھوکھر و دیگر کے ہمراہ فنڈز کی فراہمی اور فیسٹیول میں شرکت پر تمام شرکاء کا شکریہ ادا کیا جبکہ صوبائی وزیر رامیش سنگھ اروڑا نے کہا کہ سابقہ حکومت نے اقلیتوں کے ساتھ سوتیلی ماں کا سلوک کیا جس کے ازالہ کیلئے موجودہ پنجاب حکومت اقلیتوں کی محرومیوں کا خاتمہ کررہی ہے اور انہیں تمام شعبوں میں کردار ادا کرنے کے بھرپور مواقع فراہم کئے جارہے ہیں۔

Short Link: https://urdu.app.com.pk/urdu/?p=569636