ایچ بی ایل پی ایس ایل میں پہلی بار مکمل اردو کمنٹری ہوگی،ترجمان پی سی بی

لاہور۔5اپریل (اے پی پی):ایچ بی ایل پاکستان سپر لیگ (پی ایس ایل) میں پہلی بارمکمل اردو کمنٹری فراہم کی جائے گی۔ہفتہ کو ترجمان پی سی بی کے مطابق پی ایس ایل کی تاریخ میں پہلی بار پورے ٹورنامنٹ کے دوران مکمل اردو کمنٹری فراہم کی جائے گی،

اس اقدام کا مقصد کرکٹ کے جوش و خروش کو ملک بھر کے شائقین کے دلوں کے قریب لانا ہے۔ ایچ بی ایل پی ایس ایل کا 9 واں ایڈیشن 11 اپریل سے 18 مئی تک لاہور، کراچی، ملتان اور راولپنڈی میں کھیلا جائے گا۔ اس سال شائقین براہ راست نشریات اردو زبان میں دیکھ سکیں گے اور وہ اپنی قومی زبان میں لیگ کے سنسنی خیز لمحات سے بھرپور لطف اندوز ہو سکیں گے۔ اس حوالے سے ایچ بی ایل پی ایس ایل کے چیف ایگزیکٹو آفیسر سلمان نصیر کاکہنا ہے کہ ایچ بی ایل پی ایس ایل اور اس کے بڑھتے ہوئے مداحوں کے لیے یہ ایک تاریخی لمحہ ہے،

پاکستان میں کرکٹ ایک متحد قوت اور پورے کھیل کے لیے اردو میں کمنٹری پیش کر کے ہم ایچ بی ایل پی ایس ایل کے جوش و خروش کو ملک کے کونے کونے تک پہنچا رہے ہیں۔ انہوں نے مزید کہا کہ اردو کمنٹری کا سب کو بے صبری سے انتظار تھا اور ہم اسے فراہم کرنے کے لیے پرجوش ہیں،یہ اقدام نہ صرف کمیونٹی کے ساتھ ہمارا تعلق مضبوط کرتا ہے بلکہ اس بات کو بھی یقینی بناتا ہے کہ ایچ بی ایل پی ایس ایل کا جوش و خروش وسیع تر سامعین کے لیے زیادہ قابل رسائی ہے۔