ریاض۔8اپریل (اے پی پی):سعودی عرب کی وزارت حج نے عمرہ زائرین کو ہدایت کی ہے کہ عمرے کی ادائیگی کے دوران آداب کا خیال رکھیں اور مقامی قوانین کا احترام کریں ۔ اردو نیوز کے مطابق وزارت نے گزشتہ روز اپنے ایکس اکاؤنٹ پر عمرہ زائرین سے کہا ہے کہ عمرہ ایک عظیم عبادت ہے جسے آرام و سکون کے ساتھ ادا کیا جانا چاہئےاس کے لیے ضروری ہے کہ دوسروں کا خیال رکھیں اور قوانین پرعمل درآمد کریں۔
وزارت نے کہا کہ زائرین اپنے عمرہ سفر کو آسان بنانے کے لیے ازدہام والے مقامات پر تحمل کا مظاہرہ کریں اور دوسروں کو دھکے دینے سے گریز کریں ،علاوہ ازیں انتظامیہ کی ہدایات پر سختی سےعمل درآمد کیا جائے۔
وزارت نے کہا کہ عمرہ زائرین مسجد الحرام کے اندر یا باہر بردباری کا مظاہرہ کریں، معمرافراد کا خیال رکھیں ،جذبہ ایثار اور بھائی چارے کو پیش نظر رکھا جائے، بسوں میں سوار ہوتے وقت بھی اپنی باری کا انتظار کریں اور آب زم زم پینے کے وقت بھی آداب کا خاص خیال رکھا جائے۔
Short Link: https://urdu.app.com.pk/urdu/?p=579355
