برسلز ۔15اپریل (اے پی پی):یورپی یونین نےفلسطین کے لیے ایک ارب ساٹھ کروڑ یورو کے نئے تین سالہ مالی امدادی پیکج کا اعلان کیا ہے۔العربیہ کے مطابق یورپی یونین کی خارجہ پالیسی کے سربراہ کایا کالس نے ویب سائٹ پر ایک پوسٹ میں لکھاکہ ہم فلسطینی عوام کے لیے اپنی حمایت کو مضبوط کر رہے ہیں، 2027 تک 1.6 بلین یورو مغربی کنارے اور غزہ کی پٹی کی مدد کے لیے دیے جائیں گے۔
العربیہ کے مطابق فلسطینی وزیر اعظم محمد مصطفیٰ یورپی ممالک کے دورے پر لکسمبرگ پہنچے جہاں انہوں نے یورپی یونین کے اجلاس میں شرکت کی، وہ یورپی یونین کے ساتھ پہلے سیاسی مذاکراتی اجلاس میں فلسطینی وفد کی قیادت کر رہے ہیں۔بحیرہ روم کے لیے یورپی یونین کی کمشنر ڈوبراوکا سوئیکا نے ایک انٹرویو میں بتایا کہ مالی امداد فلسطینی اتھارٹی کی اصلاحات کی شرط کےساتھ مشروط ہے کیونکہ فلسطینی اتھارٹی کو ناقدین کی جانب سے بدعنوانی اور بدانتظامی کے الزامات کا سامنا ہے۔
انہوں نے کہا کہ ہم چاہتے ہیں کہ وہ اپنی اصلاح کریں کیونکہ اصلاح کے بغیر وہ نہ صرف ہمارے لیے بلکہ اسرائیل کے ساتھ بھی بات چیت کے لیے کافی مضبوط یا قابل اعتماد نہیں ہوں گے۔یورپی کمشنر کے یہ ریمارکس گزشتہ روز لکسمبرگ میں وزیر اعظم محمد مصطفیٰ سمیت یورپی یونین کے وزرائے خارجہ اور سینئر فلسطینی حکام کے درمیان پہلے "اعلیٰ سطحی سیاسی مذاکرات” سے پہلے سامنے آئے ۔
Short Link: https://urdu.app.com.pk/urdu/?p=582056
