پاناما کیس وزیراعظم محمد نواز شریف کے خلاف سازش ہے اور یہ سازش اس لئے تیار کی گئی کہ عوام کو گمراہ اورنواز شریف کی عوام میں بڑھتی ہوئی مقبولیت کو ختم کیا جا سکے، دانیال عزیز

پاناما کیس وزیراعظم محمد نواز شریف کے خلاف سازش ہے اور یہ سازش اس لئے تیار کی گئی کہ عوام کو گمراہ اورنواز شریف کی عوام میں بڑھتی ہوئی مقبولیت کو ختم کیا جا سکے، دانیال عزیز

اسلام آباد ۔ 13 جون (اے پی پی) مسلم لیگ (ن) کے رہنما دانیال عزیز نے کہا ہے کہ پاناما کیس وزیراعظم محمد نواز شریف کے خلاف سازش ہے اور یہ سازش اس لئے تیار کی گئی کہ عوام کو گمراہ اورنواز شریف کی عوام میں بڑھتی ہوئی مقبولیت کو ختم کیا جا سکے۔ سپریم کورٹ میں عمران خان اور جہانگیر ترین کے خلاف مقدمے کی سماعت کے بعد میڈیا سے گفتگو کرتے ہوئے دانیال عزیز نے کہا کہ یہ مقدمہ عجیب وغریب موڑ پر آ گیا ہے۔ انہوں نے کہا کہ حنیف عباسی کی جانب سے عمران خان اور جہانگیر ترین کے خلاف مقدمہ 2 نومبر کو دائر کیا گیا تھا اسوقت جج نے کہا تھا کہ ہم درخواستیں اکٹھی سنیں گے لیکن درخواستیں اکٹھی نہیں سنی گئیں، جو بینچ تشکیل دیا گیا وہ ختم ہوگیا اب نیا بینچ بنایا گیا ہے۔ انہوں نے کہا کہ اگر ان مقدمات کی 2 نومبر کو ہی سماعت ہوتی تو اب تک فیصلہ بھی آ جاتا۔انہوں نے پانامہ کیس سے متعلق کہا کہ وزیر اعظم کی نااہلی کا قانونی اختیار سب سے پہلے اسپیکر کو حاصل ہے پھر الیکشن کمیشن کو حاصل ہے۔ اس مقدمے کی سماعت تیسری بار ہو رہی ہے اور جے آئی ٹی کوئی ٹھوس ثبوت نہیں دے سکی، وہ کہتے ہیں کہ انہیں اب بھی تحقیقات اورثبوت اکٹھے کرنے کے لئے وقت درکار ہے۔ دانیال عزیز نے کہا کہ وزیراعظم محمد نواز شریف کے خلاف پانامہ سازش اس لئے کی گئی کہ عوام کو گمراہ اور ان کی عوام میں بڑھتی ہوئی مقبولیت کو ختم کیا جا سکے۔ انہوں نے کہا کہ وہ دعا گو ہیں کہ عوام سال 2018 میں وزیر اعظم محمد نواز شریف کو ایک بار پھر ووٹ دے کر ان تمام سازشوں کو ناکام بنا دیں اور نئے پاکستان کے خواب کو تعبیر دیں۔