لاہور ۔ 13جون (اے پی پی) پاکستان کرکٹ ٹیم کے کپتان سرفراز احمد اور فاسٹ بولر محمد عامر نے سری لنکا کے خلاف میچ میں طویل پارٹنر شپ کا ریکارڈ قائم کیا۔ چیمپئنز ٹرافی کے انتہائی اہم میچ میں پاکستان نے دلچسپ مقابلے کے بعد سری لنکا کو 3 وکٹ سے شکست دے کر سیمی فائنل کےلئے کوالیفائی کرلیا ہے جبکہ قومی ٹیم کی جیت میں کپتان سرفراز احمد اور محمد عامر کے ذمہ دارانہ کھیل کا اہم کردار ہے۔ دونوں کھلاڑیوں نے آٹھویں وکٹ کی شراکت میں 75 رنز بنائے جس کی بدولت پاکستان فتح سے ہمکنار ہوا۔ سرفراز اور عامر کی جانب سے آٹھویں وکٹ پر 75 رنز کی پارٹنر شپ آئی سی سی چیمپئنز ٹرافی کی تاریخ کی سب سے بڑی ریکارڈ پارٹنر شب بھی بن گئی ہے۔ کپتان سرفراز 61 جبکہ محمد عامر 28 رنز پر ناقابل شکست رہے۔
