لاہور۔28اپریل (اے پی پی):ترجمان محکمہ زراعت پنجاب کے مطابق کپاس کی کاشت کا دوسرا مرحلہ30 اپریل کو ختم ہو رہا ہے۔ کپاس کے کاشتکار بی ٹی اقسام کے ساتھ کم از کم10 فیصد رقبہ نان بی ٹی اقسام کا بھی کاشت کریں تاکہ حملہ آور سنڈیوں میں بی ٹی اقسام کے خلاف قوتِ مدافعت پیدا نہ ہو سکے۔
کپاس کی کاشت ترجیحا پٹڑیوں پر کریں جس کے لیے مشینی طریقہ اختیار کریں۔ اگرکاشت ڈرل سے کرنی ہو تو قطاروں کا درمیانی فاصلہ اڑھائی فٹ رکھیں اور جب فصل کا قد ڈیڑھ سے دو فٹ ہو جائے تو پودوں کی ایک لائن چھوڑ کر دوسری لائن پر مٹی چڑھا کر پٹڑیاں بنا دیں۔پٹڑیوں پر فصل میں جڑی بوٹیوں کا انسداد آسان، کھادوں کا استعمال بہتر، پانی کی بچت اور بارشوں کے نقصان سے بچت ہوتی ہے۔
ترجمان محکمہ زراعت پنجاب نے مزید کہا کہ کپاس کے کاشتکار کھادوں کا استعمال زمین کے تجزیہ کی بنیاد پر کریں تاہم فاسفورسی اور پوٹاش والی کھادوں کی تمام مقدار اور نائٹروجن کھاد کا 1/4 حصہ بوقت تیاری زمین میں ڈالیں۔اگر کھاد زمین کی تیاری کے وقت نہ ڈالی گئی ہو تو چھدرائی کے بعد استعمال کریں۔چھدرائی کے بعد استعمال کیلئے نائٹروفاس زیادہ بہتر ہے اور کھاد کو پانی میں حل کر کے آبپاشی کے ساتھ استعمال کریں۔اگیتی کاشت کی صورت میں بقیہ نائٹروجنی کھاد 4 سے5 اور موسمی کاشت کی صورت میں3 سے4 اقساط میں ڈالیں۔
Short Link: https://urdu.app.com.pk/urdu/?p=588948
