فیصل آباد ۔ 09 مئی (اے پی پی):موجودہ ملکی حالات کے پیش نظر سیکرٹری پنجاب ایمرجنسی سروس ڈیپارٹمنٹ ڈاکٹر رضوان نصیر کی ہدایت پر ڈسٹرکٹ ایمرجنسی آفیسر ریسکیو 1122 ظفر اقبال کی زیرنگرانی ضلع فیصل آباد اور اس کی تمام تحصیلوں کی مرکزی مساجد میں جامعہ جمعہ اجتماعات کے دوران ایک منظم آگاہی مہم چلائی گئی۔ اس کے علاوہ پارکو PARCO کے عملے کیلئے بھی تربیتی ورکشاپ کا انعقاد کیا گیا جس میں سی- پی-آر، فائر سیفٹی اور ہنگامی صورتِ حال میں عمارت سے انخلا کی تربیت فراہم کی گئی۔
اس مہم کا مقصد عوام کو ممکنہ ہنگامی حالات، خصوصاً ڈرون حملوں کی صورت میں فوری ردِعمل، ابتدائی طبی امداد، اور محفوظ انخلا کی اہمیت سے آگاہ کرنا تھا۔ عوام کو ہدایت کی گئی کہ کسی بھی ناخوشگوار واقعہ کی صورت میں جائے وقوعہ سے دور رہیں، غیر مصدقہ معلومات پر مبنی سوشل میڈیا افواہوں سے بچیں، اور آگ لگنے یا دیگر حادثات کے دوران خود کو اور دوسروں کو محفوظ رکھنے کے اصولوں پر عمل کریں۔
ڈسٹرکٹ ایمرجنسی آفیسر ظفر اقبال کا کہنا تھا کہ ریسکیو 1122 ہر قسم کی ایمرجنسی سے نمٹنے کے لیے نہ صرف تیار ہے بلکہ شہریوں کی زندگیوں کے تحفظ کو اپنی اولین ترجیح سمجھتا ہے۔ اس سلسلے میں آگاہی اور تربیت کا سلسلہ آئندہ بھی جاری رہے گا تاکہ عوام ہنگامی حالات میں بہتر فیصلہ سازی کر سکیں۔
Short Link: https://urdu.app.com.pk/urdu/?p=595010
