اسلام آباد۔20مئی (اے پی پی):وزیرِ دفاع خواجہ محمد آصف نے پاکستان تحریکِ انصاف (پی ٹی آئی) کی قیادت پر زور دیا ہے کہ وہ حکومت سے مذاکرات کے لیے ضد اور غیر مہذب رویے کو ترک کرے۔ منگل کو ایک نجی ٹی وی چینل سے گفتگو کرتے ہوئے انہوں نے کہا کہ پی ٹی آئی کی جانب سے قومی اداروں کے خلاف غیر جمہوری زبان استعمال کی جا رہی ہے اور اس نےکئی مواقع پر مذاکرات سے انکار کیا ہے۔
انہوں نے کہا کہ اپوزیشن کے ساتھ سیاسی تعلقات معمول پر لانے کی راہ میں سب سے بڑی رکاوٹ پی ٹی آئی کا غیر شائستہ رویہ ہے۔بھارتی پروپیگنڈے پر تبصرہ کرتے ہوئے خواجہ آصف نے کہا کہ بھارتی میڈیا کی منفی مہم کے باوجود پاکستان نے ہر محاذ پر کامیابیاں حاصل کی ہیں۔ انہوں نے مزید کہا کہ جنگ کے دوران اور سیزفائر کے بعد بھارتی قیادت کو خود اپنی قوم کی جانب سے سخت تنقید کا سامنا کرنا پڑا۔
Short Link: https://urdu.app.com.pk/urdu/?p=599532
