اقوام متحدہ۔23مئی (اے پی پی):اقوام متحدہ کی سلامتی کونسل نے پاکستان کے صوبہ بلوچستان کے علاقے خضدار میں سکول بس پر دہشت گرد حملے کی شدید مذمت کرتے ہوئے مجرموں کو انصاف کے کٹہرے میں لانے کا مطالبہ کیا۔ 15 رکنی کونسل کی طرف سے گزشتہ روز جاری پریس بیان میں کہا گیا ہے کہ خضدار میں دہشت گردی کے اس قابل مذمت اقدام کے نتیجے میں 6 شہری جاں بحق ہوئے جن میں 4 سکول جانے والے بچے بھی شامل تھے اور 53 افراد زخمی ہوئے جن میں سے 39 بچے شامل تھے۔
سلامتی کونسل کے اراکین نے متاثرین کے خاندانوں،پاکستان کی حکومت اور عوام سے ہمدردی اور تعزیت اور زخمیوں کی جلد اور مکمل صحت یابی کے لئے نیک خواہشات کا اظہار کیا۔ انہوں نے اس بات کا اعادہ کیا کہ دہشت گردی اپنی تمام شکلوں اور مظاہر میں بین الاقوامی امن اور سلامتی کے لیے سب سے سنگین خطرات میں سے ایک ہے، اور دہشت گردی کی ان قابل مذمت کارروائیوں کے مرتکب افراد، منتظمین، مالی معاونت کرنے والوں اور سپانسرز کا احتساب کرنے اور انہیں انصاف کے کٹہرے میں لانے کی ضرورت پر زور دیا۔
کونسل کے اراکین نے تمام ریاستوں پر زور دیا کہ وہ اس سلسلے میں حکومت پاکستان کے ساتھ فعال تعاون کریں۔ بیان میں کہا گیا کہ سلامتی کونسل کے ارکان نے اس بات کا اعادہ کیا کہ محرکات سے قطع نظر دہشت گردی کی کوئی بھی کارروائی مجرمانہ اور بلاجواز ہے، چاہے اس کا ارتکاب جہاں بھی، جب بھی اور جس نے بھی کیا ہو۔
انہوں نے اقوام متحدہ کے چارٹر اور بین الاقوامی قانون کے تحت بین الاقوامی انسانی حقوق کے قانون، بین الاقوامی پناہ گزینوں کے قانون اور بین الاقوامی انسانی قانون سمیت دیگر ذمہ داریوں کے مطابق تمام ریاستوں کو دہشت گردی کی کارروائیوں سے پیدا ہونے والے بین الاقوامی امن اور سلامتی کو لاحق خطرات سے نمٹنے کی ضرورت کا اعادہ کیا۔
Short Link: https://urdu.app.com.pk/urdu/?p=600497