مریم نواز نے جے آئی ٹی میں پیش ہو کر ایک نئی تاریخ رقم کر دی،امیر مقام

مریم نواز نے جے آئی ٹی میں پیش ہو کر ایک نئی تاریخ رقم کر دی
کے پی کے کے عوام صحت سمیت تمام بنیادی سہولیات کو ترس رہے ہیں ،احتساب کا نعرہ لگانے والے عمران خان نے کے پی کے احتساب بیورو کو تالے لگا دیئے ہیں،امیر مقام

اسلام آباد ۔ 5 جولائی (اے پی پی) وزیر اعظم کے مشیر اور پاکستان مسلم لیگ خیبر پختونخوا کے صدر امیر مقام نے کہا ہے کے پی کے کے عوام صحت سمیت تمام بنیادی سہولیات کے لئے ترس رہے ہیں احتساب کا نعرہ لگانے والے عمران خان نے کے پی کے احتساب بیورو کو تالے لگا دیئے ہیں۔ان خیالات کا اظہار انہوں نے بدھ کو جے آئی ٹی کے باہر صحافیوں سے گفتگو کرتے ہوئے کیا ۔امیر مقام نے کہا کہ ملک کو ترقی کے راستے پر ڈالنے کے لئے وزیر اعظم محمد نواز شریف دن رات محت کر رہے ہیں ۔انہوں نے کہا کہ وزیر اعظم محمد نواز شریف نے آئین و قانون کی بلادستی اور ملکی اداروں کی مضبوطی کے لئے اپنے سمیت تمام خاندان کو احتساب کے لئے پیش کر دیا ہے ۔انہوں نے کہا کہ مریم نواز نے جے آئی ٹی میں پیش ہو کر ایک نئی تاریخ رقم کر دی ہے ۔انہوں نے کہا کہ کے پی کے کی عوام عمران خان کی متاثرین میں شامل ہے ان کی جماعت نے چار سالوں میں کوئی کام نہیں کیا میں عوامی آدمی ہوں اور ہسپتالوں میں اکثر جاتا ہوں ان کی صورت حال دیکھ کر رونا آتا ہے ۔انہوں نے کہا کہ عمران خان احتساب کی بات کرتا ہے لیکن کے پی کے احتساب بیورو کو تالے لگا دیئے ہیں ۔