وزیر داخلہ کاانٹرنیشنل ڈرائیونگ لائسنس اور ڈومیسائل کے اجراءکی مد میں زائد فیس کی وصولی کی شکایت کا نوٹس

اسلام آباد ۔ 06 جولائی (اے پی پی) وزیر داخلہ چوہدری نثار علی خان نے اسلام آباد انتظامیہ کی جانب سے انٹرنیشنل ڈرائیونگ لائسنس اور ڈومیسائل کے اجراء کی مد میں زائد فیس کی وصولی کی شکایت کا نوٹس لیتے ہوئے حکام کو چوبیس گھنٹے میں رپورٹ پیش کرنے کی ہدایت کی ہے۔جمعرات کو وزارت داخلہ سے جاری بیان کے مطابق وزیر داخلہ نے کہا کہ اسلام آباد انتظامیہ اس بات کی وضاحت کرے کہ بادی النظر زائد فیس کی وصولی کن وجوہات کی بنا پر اور کیوں کی جا رہی ہے۔ چوہدری نثار علی خان نے کہا کہ اس بات کا بھی تعین کیا جائے کہ زائد فیس کی وصولی کب سے اور کس کی منظوری سے کی جا رہی ہے، ایک ہی دستاویز کے اجراءکے لیے ملک کے مختلف حصوں میں مختلف فیس کا وصول کیا جانا غیر منصفانہ اور غیر منطقی ہے جس کی کسی صورت اجازت نہیں دی جا سکتی ، وزیر داخلہ نے حکام کو چوبیس گھنٹے میں رپورٹ پیش کرنے کی ہدایت کی ہے۔