مسلم لیگ (ن) راولپنڈی کی جانب سے دی جانے والی عید ملن پارٹی سے وفاقی وزیر پٹرولیم و قدرتی وسائل شاہد خاقان عباسی کا خطاب

راولپنڈی۔06جولائی (اے پی پی )وفاقی وزیر پٹرولیم و قدرتی وسائل شاہد خاقان عباسی نے کہا ہے کہ جے آئی ٹی وزیر اعظم محمد نواز شریف کی ساکھ کو نقصان پہنچانے کی سازش ہے، شریف خاندان پر کوئی الزام نہیں ہے ،ہمیں تو اس امر کا علم نہیں کہ شریف خاندان پر الزام کیا ہے ؟، جے آئی ٹی ملکی ترقی کے عمل میں رکاوٹ ڈالنے کی ناکام کوشش ہے ،پانامہ معاملہ پر جے آئی ٹی کا تماشا لگا ہوا ہے کسی کو پتا ہی نہیں کہ وزیراعظم یا ان کے بچوں پر الزام کیا ہے۔ مسلم لیگ (ن) راولپنڈی کی جانب سے دی جانے والی عید ملن پارٹی کے موقع پر تقریب سے خطاب کرتے ہوئے شاہد خاقان عباسی نے کہا کہ اس سے پہلے وزیر اعظم نواز شریف آمریت کے دور میں بنائی جانے والی کئی جے آئی ٹی کا سامنا کرچکے ہیں لیکن آج تک کچھ ثابت نہیں ہوسکا۔ وفاقی وزیرنے کہاکہ ہمیں کسی قسم کی کوئی شرمندگی نہیں یہ حکومت اپنا وقت پورا کرے گی۔وفاقی وزیر پٹرولیم و قدرتی وسائل شاہد خاقان عباسی نے کہاکہ رواں برس نومبر میں بجلی اور گیس لوڈ شیڈنگ ختم ہوجائے گی ،رواں برس 11000 میگا واٹ بجلی سسٹم میں شامل ہو جائے گی ،ملکی ترقی کا عمل اسی طرح جاری رہا تو پاکستان دنیا کی 20بڑی معیشتوں میں شامل ہو جائے گا ،گیس کے نئے کنکشن بھی کھول دیئے گئے ہیں ، مسلم لیگ (ن) کی حکومت نے اپنے دور حکومت میں توانائی کے بے شمار منصوبے شروع کیے ،گذشتہ حکومتوں نے توانائی بحران کے خاتمے کی سنجیدہ کوششیں نہیں کیں ۔