وزیراعظم محمد نواز شریف کا سہ فریقی سربراہ کانفرنس سے خطاب

پاکستان، افغانستان اور تاجکستان کا مشترکہ خوشحالی کیلئے علاقائی تعاون اور رابطوں کو فروغ دینے کیلئے مل کر کام کرنے کا عزم،کاسا۔1000 منصوبے پر جلد عملدرآمد کیلئے اقدامات پر اتفاق، علاقائی راہداری کو بہتر بنانے کیلئے سہ فریقی ٹرانزٹ ٹریڈ معاہدے کو جلد حتمی شکل دینے کی ضرورت ہے، وزیراعظم محمد نواز شریف کا سہ فریقی سربراہ کانفرنس سے خطاب

پوگوس (تاجکستان) ۔ 06جولائی (اے پی پی) پاکستان، افغانستان اور تاجکستان نے مشترکہ خوشحالی کیلئے علاقائی تعاون اور رابطوں کو فروغ دینے کیلئے مل کر کام کرنے کا عزم ظاہر کیا ہے، یہ عزم تاجکستان کے صدر امام علی رحمانوف کی دعوت پر دوشنبے میں ہونے والی پاکستان، تاجکستان اور افغانستان کی سہ فریقی سربراہ کانفرنس کے موقع پر کیا گیا، سربراہ کانفرنس میں وزیراعظم محمد نواز شریف، افغانستان کے صدر اشرف غنی اور تاجکستان کے صدر امام علی رحمانوف نے مناسب بنیادی ڈھانچے اور رابطے کی کمی کی وجہ سے خطے کو درپیش اقتصادی اور سیکورٹی چیلنجوں پر تبادلہ خیال کیا۔ اجلاس سے خطاب کرتے ہوئے وزیراعظم نواز شریف نے تاجکستان کے صدر امام علی رحمانوف کے اس اقدام کو رابطے اور بنیادی ڈھانچے کی کمی، دہشتگردی اور انتہاءپسندی جیسے چیلنجوں سے مل کر نمٹنے کیلئے ایک موقع قرار دیا۔ وزیراعظم نے افغانستان اور تاجکستان سے پاکستان کی بندرگاہوں کے ذریعے سامان کی تیزی سے ترسیل کیلئے جدید سہولیات کی فراہمی کے حوالے سے پاکستان کے عزم کا اظہار کیا۔ انہوں نے علاقائی راہداری کو بہتر بنانے کیلئے سہ فریقی ٹرانزٹ ٹریڈ معاہدے کو جلد حتمی شکل دینے کی ضرورت پر زور دیا۔ پاکستان، افغانستان اور تاجکستان کے رہنماﺅں نے کاسا۔1000 منصوبے پر جلد عملدرآمد کیلئے اقدامات پر بھی اتفاق کیا جس کے ذریعے وسطی ایشیاءسے جنوبی ایشیاءکیلئے بجلی کی ترسیل ہوگی اور خطے میں پائیدار اقتصادی اور سماجی ترقی کو فروغ ملے گا۔ وزیراعظم نے چار فریقی سربراہ اجلاس کا انعقاد کرنے پر بھی تاجکستان کے صدر امام علی رحمانوف کا شکریہ ادا کیا۔ انہوں نے کہا کہ کاسا 1000 منصوبے میں پاکستان، افغانستان، تاجکستان، کرغزستان اور دیگر بین الاقوامی شراکت دار شریک ہیں۔ وزیراعظم نواز شریف نے سیاست، معیشت اور سماجی شعبوں میں سہ طرفہ تعاون کو مضبوط بنانے کیلئے سہ فریقی وزارتی کمیشن کے قیام کیلئے تاجکستان کے صدر امام علی رحمانوف کی تجویز کا بھی خیرمقدم کیا۔