وزیر مملکت برائے اطلاعات، نشریات و قومی ورثہ مریم اورنگزیب کی نجی ٹی وی چینل سے بات چیت

اسلام آباد ۔ 06 جولائی (اے پی پی) وزیر مملکت برائے اطلاعات، نشریات و قومی ورثہ مریم اورنگزیب نے عمران خان اقتدار کی ہوس اور لالچ میں مبتلا ہیں، عمران خان صرف شیروانی پہننا چاہتے ہیں اور وہ اس کے لئے ہر وہ راستہ اختیار کر رہے ہیں جو انہیں وہاں تک پہنچائے،ایک ایسا شخص جو خود الیکشن کمیشن میں فارن فنڈنگ کیس کا جواب نہیں دیتا وہ دوسروں کے احتساب کی بات کس منہ سے کرتا ہے، عمران خان عدالت میں یہ بات کہتے ہیں کہ ہمارا کام تو الزام لگانا ہے ثبوت فراہم کرنا نہیں جبکہ دوسری طرف منی لانڈرنگ اور کرپشن کا واویلا کرتے ہیں، عمران خان یہ بتائیں کہ اکبر ایس بابر، تسنیم نورانی اور جسٹس (ر) وجیہہ الدین کے پاس ایسا کیا ہے جس سے وہ بھاگ رہے ہیں، عمران خان کو ہر بات کا جواب اب سود سمیت ملے گا اور وہ اس کیلئے تیار رہیں،وزیراعظم محمد نوازشریف نہ صرف ملک بلکہ خطے کے ایک بڑے لیڈر کے طور پر ابھر کر سامنے آئے ہیں جنہوں نے ملک کو ائٹمی قوت بنایا اور پاکستانی عوام کو سی پیک جیسے گیم چینجر منصوبے کا تحفہ دیا‘کسی کو یہ گمان ہو کہ چور دروازے سے اقتدار کا حصول ممکن ہو گا ایسا ہرگز نہیں، اقتدار ہمیشہ عوام کے ووٹوں سے ہی حاصل ہو گا۔ ان خیالات کا اظہار انہوں نے جمعرات کو ایک نجی ٹی وی چینل سے گفتگو کرتے ہوئے کیا۔ انہوں نے کہا کہ اب کچھ بیرونی طاقتیں اندرونی لوگوں کے ساتھ ملکر کوشش کر رہی ہیں کہ پاکستان نے ترقی و خوشحالی کا جو سفر شروع کیا ہے اس سے پیچھے ہٹ جائے۔ انہوں نے کہا کہ تمام سرویز اور حالیہ انتخابات کے نتائج کے مطابق وزیراعظم محمد نوازشریف سب سے مقبول لیڈر ہیں اور پاکستان مسلم لیگ (ن) ملک کی سب سے بڑی جماعت ہے۔ انہوں نے کہا کہ اکنامک انٹیلیجنس یونٹ کا حالیہ سروے بھی اس بات کا عکاس ہے۔ وزیر مملکت کا کہنا تھا کہ طویل عرصہ کے بعد ملک میں جمہوریت کا تسلسل بحال ہوا ہے، کوئی بھی جمہوریت قربانیوں کے بغیر مستحکم نہیں ہوتی۔