وزیر تجارت انجینئر خرم دستگیر خان کی عالمی تجارتی تنظیم میں کیس لڑنے والے وزارت تجارت کے حکام کی کاوشوں کی تعریف

اسلام آباد ۔ 07جولائی (اے پی پی) ورلڈ ٹریڈ آرگنائزیشن (ڈبلیو ٹی او) نے پاکستان کے حق میں فیصلہ دیتے ہوئے منرل پانی کی بوتلیں بنانے میں استعمال ہونے والے کیمیکل پولی ایتھائیلین ٹیری فلیٹ کی برآمد بارے یورپی کمیشن کے اقدام کو روک دیا اور یورپی کمیشن کے تلافی ڈیوٹی عائد کرنے کے اقدام کو عالمی تجارتی تنظیم (ڈبلیو ٹی او) کے قواعد و ضوابط کی خلاف ورزی قرار دے دیا ۔ عالمی تجارتی تنظیم نے واشگاف طور پر قرار دیا کہ پاکستان میں پی ای ٹی کے لاگو کردہ یورپی کمیشن کے اقدامات عالمی تجارت تنظیم کے زر اعانت اور تلافی کرنے کے ضوابط کے مطابق نہیں ہیں۔ جنیوا میں موجود تجارتی ماہرین نے جنیوا میں کئی جہتی فورم میں اسے پاکستان کی بہت بڑی سفارتی کامیابی قرار دیا ہے، عالمی تجارتی تنظیم کے ایڈجوکیٹنگ پینل کی طرف سے گزشتہ روز اس ضمن میں رپورٹ جاری کی گئی تھی۔