چیئرمین نیب قمر زمان چوہدری کا عملدرآمد سے متعلق جائزہ اجلاس سے خطاب

اسلام آباد ۔ 7 جولائی (اے پی پی) قومی احتساب بیورو (نیب) کے چیئرمین قمر زمان چوہدری نے کہا ہے کہ بدعنوانی کا خاتمہ نہ صرف نیب کی اولین ترجیح ہے بلکہ ہماری قومی ذمہ داری ہے، نیب ملک سے بدعنوانی کو آہنی ہاتھوں سے کچلنے کیلئے پرعزم ہے، بدعنوان عناصر کو کیفر کردار تک پہنچانے کیلئے تمام وسائل بروئے کار لائے جائیں گے۔ ان خیالات کا اظہار انہوں نے نیب ہیڈ کوارٹرز میں گذشتہ ماہانہ رابطہ اجلاس میں کئے گئے فیصلوں پر عملدرآمد سے متعلق جائزہ اجلاس کی صدارت کرتے ہوئے کیا۔ انہوں نے کہا کہ بدعنوانی ملکی خوشحالی کے راستے میں سب سے بڑی رکاوٹ ہے، نیب کو بدعنوانی کے خاتمہ کیلئے ملک کے اعلیٰ ادارہ کے طور پر قائم کیا گیا اور بدعنوان عناصر سے لوٹی گئی رقم برآمد کرنے کی ذمہ داری سونپی گئی، نیب کی انسداد بدعنوانی کی موثر حکمت عملی کے تحت نیب کو گذشتہ 16 سال کے دوران 3 لاکھ 43 ہزار 356 شکایات موصول ہوئی ہیں جن کو قانون کے مطابق نمٹایا گیا۔ نیب نے 11581 شکایات کی جانچ پڑتال کی ہے جبکہ 7587 انکوائریاں اور 3846 انوسٹی گیشنز نمٹائی ہیں جبکہ احتساب عدالتوںمیں2808 ریفرنس دائر کئے۔ نیب کی مجموعی سزا کی شرح 76 فیصد ہے جو کہ گزشتہ 16 سال کے دوران سب سے بہترین کارکردگی ہے۔ انہوں نے کہا کہ نیب مالی کمپنیوں میں دھوکہ دہی، بینک فراڈز، بینک نادہندگان، لوگوں سے بڑے پیمانے پر فراڈ اور ملازمین کے سرکاری فنڈز میں گھپلوں کے مقدمات کو نیب ترجیحی بنیادوں پر نمٹاتا ہے۔ نیب نے اپنے قیام سے لے کر اب تک بدعنوان عناصر سے لوٹے گئے 287 ارب روپے وصول کرکے قومی خزانہ میں جمع کرائے ہیں جو کہ نمایاں کامیابی ہے۔