مسلم لیگ (ن) کی حکومت نے بجلی کی لوڈ شیڈنگ میں واضح کمی کی ہے،چیئرمین سرمایہ کاری بورڈ مفتاح اسماعیل کی نجی ٹی وی چینل سے گفتگو

اسلام آباد ۔ 07 جولائی (اے پی پی) سرمایہ کاری بورڈ کے چیئرمین مفتاح اسماعیل نے کہا ہے کہ پاکستان مسلم لیگ (ن) کی حکومت نے ملک سے بجلی کی لوڈ شیڈنگ میں واضح کمی کی ہے۔ جمعہ کو ایک ٹی وی چینل سے بات چیت کرتے ہوئے انہوں نے حویلی بہادر شاہ پاور پلانٹ منصوبے کو سراہا جس کا افتتاح گزشتہ روز وزیراعظم محمد نواز شریف نے کیا۔ انہوں نے کہا کہ اس منصوبے سے ملک میں بڑھتی ہوئی توانائی کی ضروریات کو پورا کرنے میں مدد ملے گی۔ چیئرمین سرمایہ کاری بورڈ کا کہنا تھا کہ ٹرانسمیشن لائنوں اور بجلی کی ترسیل و تقسیم پر کام تیزی سے جاری ہے اور حکومت تمام صارفین اور صنعتوں کو بلاتعطل بجلی فراہم کر رہی ہے۔ انہوں نے کہا کہ کولیکشن سسٹم کو مذید بہتر بنانے کے لیے لائن لاسز کو کم کرنا انتہائی ضروری ہے۔ مفتاح اسماعیل کا کہنا تھا کہ ملک بھر سے بجلی بحران کے مکمل خاتمے کے لیے پاکستان مسلم لیگ (ن) کی حکومت نے توانائی کے متعدد منصوبے شروع کر رکھے ہیں جن کی تکمیل سے بہت جلد ملک سے اندھیروں کا خاتمہ یقینی بنا دیا جائے گا۔