آسٹریلیا کی ٹیم ویسٹ انڈیز کے خلاف ٹیسٹ میچ کے پہلے روز اپنی پہلی اننگز میں 225 رنز بنا کر پویلین لوٹ گئی

کنگسٹن۔13جولائی (اے پی پی):آسٹریلیا کی ٹیم ویسٹ انڈیز کے خلاف ٹیسٹ میچ کے پہلے روز اپنی پہلی اننگز میں 225 رنز بنا کر پویلین لوٹ گئی۔ سبائنا پارک، کنگسٹن میں کھیلے جا رہے میچ میں آسٹریلیا نے ٹاس جیت کر پہلے بیٹنگ کا فیصلہ کیا تاہم ویسٹ انڈیز کے باؤلرز نے شاندار کارکردگی دکھاتے ہوئے مہمان ٹیم کو سنبھلنے نہ دیا۔

آسٹریلیا کی جانب سے سٹیون سمتھ 48 اور کیمرون گرین 46 رنز کے ساتھ نمایاں بیٹر رہے۔ عثمان خواجہ 23 ، کپتان پیٹ کمنز 24، تریوس ہیڈ 20، ایلیکس کیری 21، سیم کونسٹاس 17، بیو ویبسٹر 1، جوش ہیزل ووڈ 4 اور مچل سٹارک بغیر کوئی رن بنائے آؤٹ ہوئے۔

ویسٹ انڈیز کی جانب سے شمر جوزف نے شاندار باؤلنگ کا مظاہرہ کرتے ہوئے 4 کھلاڑیوں کو پویلین کی راہ دکھائی۔ جیڈن سیلز اور جسٹن گریوز نے بھی متاثر کن کارکردگی دکھاتے ہوئے 3، 3 وکٹیں حاصل کیں۔ جواب میں ویسٹ انڈیز نے دن کے اختتام تک ایک وکٹ کے نقصان پر 16 رنز بنا لیے۔