تحریک انصاف کے وکیل الیکشن کمیشن کو منی ٹریل پر جواب دینے سے گریز کر رہے ہیں،دانیال عزیز

اسلام آباد ۔ 10 جولائی (اے پی پی) مسلم لیگ (ن) کے رہنما دانیال عزیز نے کہا ہے کہ چیف الیکشن کمشر نے پاکستان تحریک انصاف کے وکیل کو کہا کہ آج آپ کا آخری موقع تھا کہ آپ اپنی پارٹی کی فارن فنڈنگ کے کیس جمع کرائیں اور منی ٹریل دیں جس پر ان کے وکیل نے کہا کہ وہ اس کا جواب دینے کے مجاز نہیں ہیں ۔الیکشن کمیشن کے باہر میڈیا سے گفتگو کے دوران دانیال عزیز نے کہا کہ عمران خان حیلے بہانے کر کے سپریم کورٹ اور الیکشن کمیشن کو جواب دینے سے گریز کر رہے ہیں اور مہلت مانگ رہے ہیں ۔انہوں نے کہا کہ ہمیں نظر آرہا ہے کہ پی ٹی آئی گلگت اور کراچی کے ضمنی انتخابات میں نیچے سے فرسٹ آئی ہے۔انہوں نے کہا کہ عمران خان کا کردار پوری قوم کے سامنے ہے یہ نئے پاکستان کی خوشبو نہیں بلکہ پرانے پاکستان کا آخری حربہ ہیں۔انہوں نے کہا کہ عمران خان اشتہاری ہیں، وزیر اعظم محمد نواز شریف کا کا نام پاناما پیپرز میں نہیں پھر بھی انہیں عدالتوں میں طلب کیا جارہا ہے۔