ایل این جی متبادل ایندھن میں سب سے سستی ہے، دستیابی میں کوئی کمی نہیں ہو گی، شاہد خاقان عباسی

اسلام آباد ۔ 10 جولائی (اے پی پی) وفاقی وزیر پٹرولیم و قدرتی وسائل شاہد خاقان عباسی نے کہا ہے کہ ایل این جی متبادل ایندھن میں سب سے سستی ہے، اس کی دستیابی میں کوئی کمی نہیں ہو گی۔ پیر کو قومی اسمبلی کی قائمہ کمیٹی برائے پٹرولیم و قدرتی وسائل کے اجلاس میں اظہار خیال کرتے ہوئے انہوں نے کہا کہ ایل این جی کی قیمت اس وقت 750 روپے فی ایم ایم بی ٹی یو ہے جبکہ ایل پی جی کا سلنڈر 2 ہزار روپے میں پڑتا ہے۔ انہوں نے کہا کہ یہ کہنا درست نہیں کہ ایل این جی مہنگی ہے، 18 ویں ترمیم کے بعد پنجاب میں گیس 40 فیصد کم ہو گئی ہے، موجودہ حکومت کے دور میں ایس این جی پی ایل کی طرف سے فراہم کئے جانے والے کنکشنوں کی تعداد 20 لاکھ سے بڑھ جائے گی، اب نجی شعبہ بھی ایل این جی کی صورت میں گیس منگوا سکتا ہے، ایل این جی کی ملک میں کوئی قلت نہیں ہو گی۔