سینیٹر راجہ ظفر الحق اور دیگر مقررین کا سیمینار سے خطاب

اسلام آباد ۔ 10 جولائی (اے پی پی) سینٹ میں قائد ایوان سینیٹر راجہ ظفر الحق نے کہا ہے کہ آزادی ہر شخص کا بنیادی حق ہے اور بھارت کسی صورت میں بھی کشمیریوں سے ان کا یہ حق نہیں چھین سکتا۔ پیر کو یوتھ فورم فار کشمیر کے زیر اہتمام انسٹیٹیوٹ آف سٹرٹیجک سٹڈیز اسلام آباد کے تعاون سے ”بھارتی مقبوضہ کشمیر میں آزادی کی نئی لہر: ایک جائزہ“ کے عنوان سے سیمینار کا انعقاد انسٹیٹیوٹ آف سٹرٹیجک سٹڈیز اسلام آباد میں کیا گیا جو کہ برہان وانی کی بھارتی قابض افواج کے ہاتھوں شہادت کی پہلی برسی کی مناسبت سے تھا۔ مقررین میں مہمانِ خصوصی راجہ ظفر الحق لیڈر آف دی ہاوس سینیٹ آف پاکستان، ایمبیسیڈر خالد محمودچیئرمین آئی ایس ایس آئی، احمد قریشی ایگزیکٹو ڈائریکٹر انٹرنیشنل کشمیر لابی گروپ(یوتھ فورم فار کشمیر)، احمر بلال صوفی ماہر قانون، لیفٹیننٹ جنرل(ر) سینیٹرعبدالقیوم، علی محمد خان رکن قومی اسمبلی، الطاف حسین وانی سینئر لیڈر ، شائستہ صفی لابسٹ یوتھ فورم فار کشمیر ، اور دیگر شامل تھے۔ قائد ایوان سینیٹر راجہ ظفر الحق نے خطاب کرتے ہوئے کہا کہ کشمیر کی آزادی سیاسی سطح پر اقوامِ متحدہ کی قراردادوں کی روشنی میں ہی ممکن ہے۔