صدر مملکت ممنون حسین کی حبیب پبلک اسکول کراچی کے طلبہ کے وفد سے بات چیت

اسلام آباد ۔ 10 جولائی (اے پی پی) صدر مملکت ممنون حسین نے کہا ہے کہ دنیا تیز رفتار تبدیلیوں کی زد میں ہے جن سے خود کو ہم آہنگ کرنے کے لیے پاکستانی طلبا خوب محنت کریں تاکہ وطن عزیز ترقی کر کے اقوام عالم میں حقیقی مقام حاصل کر سکے۔ صدر مملکت نے یہ بات حبیب پبلک اسکول کراچی کے طلبہ کے ایک وفد سے بات چیت کرتے ہوئے کہی۔ اس موقع پر صدر مملکت کو حبیب پبلک اسکول کی یادگاری شیلڈ بھی پیش کی گئی۔ صدر مملکت نے کہا کہ تحقیق پر توجہ دیے بغیر دنیا کی کوئی قوم ترقی نہیں کر سکتی، اس لیے نوجوان زندگی کے مختلف شعبوں میں تحقیق کو اپنا شعار بنائیں۔ انھوں نے کہا کہ انفارمیشن اور ڈیجیٹل ٹیکنالوجیز مستقبل کی ٹیکنالوجیز ہیں جن میں پاکستان کی نئی نسل کو خصوصی مہارت حاصل کرنی چاہیے تاکہ وہ نئے دور کے تقاضوں سے ہم آہنگ ہو کر وطن عزیز کی خدمت کر سکیں۔ صدر مملکت نے کہا کہ حبیب پبلک اسکول اور کراچی کے تعلیمی اداروں نے ماضی میں بڑا نام پیدا کیا اور کھیل سمیت زندگی کے مختلف شعبوں میں بڑے بڑے نام پیدا کیے لیکن گزشتہ کچھ عرصے کے دوران کراچی اپنی امتیازی حیثیت برقرار نہ رکھ سکا، لہذا ضروری ہے کہ کراچی کے تعلیمی ادارے ہم نصابی سرگرمیوں کو فروغ دیں تاکہ زندگی کے مختلف شعبوں میں ملک وقوم کی خدمت کرنے والے نوجوان پھر سامنے آنے لگیں۔ انھوں نے کہا کہ اس سلسلے میں حبیب پبلک اسکول کو پہل کرنی چاہیے۔صدر مملکت نے کہا کہ پاکستان اللہ کی بہت بڑی نعمت ہے جس کی ترقی اور حفاظت ہماری اولین ذمہ داری ہے۔ اس فریضے کی ادائیگی صرف اسی صورت میں ممکن ہو سکے گی اگر ہماری نوجوان نسل پوری احساس ذمہ داری کے ساتھ تعلیم پر توجہ دے کر قومی ترقی کے حقیقی معمار بن جائیں۔