سپریم کورٹ ، عمران خان اورجہانگیرترین کی نااہلی کیس میں پی ٹی آئی کے وکیل کی کیس ملتوی کرنے کی درخواست مسترد

اسلام آباد ۔ 11 جولائی (اے پی پی) سپریم کورٹ نے تحریک انصاف کے سربراہ عمران خان اورسیکرٹری جنرل جہانگیرترین کی نااہلی کے حوالے سے کیس میں تحریک انصاف کے وکیل کی جانب سے کیس ملتوی کرنے کی درخواست مسترد کرتے ہوئے ہدایت کی ہے کہ وکلاءعدالت کے ساتھ مکمل تعاون کریں، تمام سیاسی جماعتوں کے ساتھ یکساں سلوک کیاجائے ، پارٹی فنڈنگ کے معاملے پرکمیشن مقرر کرنا یا نہ کرنا عدالت کی صوابدید ہے لیکن فیصلہ کرتے وقت الیکشن کمیشن کی پوزیشن کو بھی دیکھنا ہوگا پاکستان میں ٹیکس نہ دینے والا بچ اور دینے ولا پھنس جاتا ہے اس لئے ٹیکس دینے والوں کی تعداد کم ہے ،منگل کوچیف جسٹس ثاقب نثار کی سربراہی میں تین رکنی بینچ نے کیس کی سماعت کی ، اس موقع پر درخواست گزار حنیف عباسی کے وکیل اکرم شیخ نے دلائل کا آغاز کرتے ہوئے موقف اپنایا کہ پی ٹی آئی نے ان کے موکل کی متفرق درخواستوں کے جواب نہیں دیئے، اس طرح عمران خان نے اپنے ٹی وی انٹرویوز پر مبنی درخواستوں کا بھی جواب نہیں دیاجس پر چیف جسٹس نے کہاکہ عدالت نے اس بارے میں ہدایت کی تھی کہ عمران خان چاہیں تووہ جواب دے سکتے ہیں تاہم اس معاملے میں کچھ خلا موجود ہے اور عدالت نہیں چاہتی کہ کسی وجہ سے کیس کی سماعت میں رکاوٹ پیداہو ، سماعت کے دوران الیکشن کمیشن کے جواب پرپی ٹی آئی کی جانب سے جواب الجواب دینے میں تاخیر پر چیف جسٹس نے نا پسندید گی کااظہارکیا تو پی ٹی آئی کے وکیل فیصل چوہدری نے عدالت سے معذرت کی کہ وہ جواب میں تاخیر پر معذرت خواہ ہیں۔ چیف جسٹس نے ان سے کہاکہ ججز اپنی چھٹیاں چھوڑ کر مقدمات کی سماعت کررہے ہیں، آپ کی جانب سے صرف معذرت کرنے سے کچھ نہیں بنے گا یہ دوطرفہ تعاون کی بات ہے اوراسی پرمعاملات چلتے ہیں۔