دمشق۔25جولائی (اے پی پی):سعودی عرب کی سرکاری اور نجی کمپنیاں شام میں 6.4 ارب ڈالر کی سرمایہ کاری کریں گی۔ سعودی پریس ایجنسی کی رپورٹ کے مطابق یہ بات سعودی وزیر سرمایہ کاری خالد الفالح نے شامی دارالحکومت دمشق میں جاری سعودی شامی سرمایہ کاری فورم سے خطاب میں کہی ۔ فورم میں سعودی عرب کے 20 سے زیادہ سرکاری ادارے اور نجی شعبے کی 100 سے زیادہ کمپنیاں شریک …
سعودی عرب کا شام میں اربوں ڈالر کی سرمایہ کاری کا اعلان
دمشق۔25جولائی (اے پی پی):سعودی عرب کی سرکاری اور نجی کمپنیاں شام میں 6.4 ارب ڈالر کی سرمایہ کاری کریں گی۔ سعودی پریس ایجنسی کی رپورٹ کے مطابق یہ بات سعودی وزیر سرمایہ کاری خالد الفالح نے شامی دارالحکومت دمشق میں جاری سعودی شامی سرمایہ کاری فورم سے خطاب میں کہی ۔ فورم میں سعودی عرب کے 20 سے زیادہ سرکاری ادارے اور نجی شعبے کی 100 سے زیادہ کمپنیاں شریک ہیں۔
سعودی وزیر سرمایہ کاری نےکہا ہے کہ فورم کے دوران 47 معاہدوں اور مفاہمت کی یادداشتوں پر دستخط متوقع ہیں، جن کی مالیت 6.4 ارب ڈالر ہے ۔ انہوں نے کہا کہ شام کے ساتھ خصوصاً اقتصادی اور سرمایہ کاری کے شعبوں میں تعلقات مضبوط بنانے کے لئے پرعزم ہیں۔ ولی عہد شہزادہ محمد بن سلمان کی خصوصی ہدایات پر سعودی عرب شام میں توانائی ، ریئل سٹیٹ ، صنعت اور انفراسٹرکچر سمیت متعدد شعبوں میں سرمایہ کاری کر رہا ہے ۔
اس کا مقصد شام کی ترقی اور تعمیر نو کے حوالے سے مملکت کے واضح موقف کو عملی شکل دینا ہے۔انہوں نے بتایا کہ شام کی ترقی اور تعمیر نو اور اقتصادی ترقی میں شمولیت کے لئے معروف سعودی کمپنیوں کے 500 تاجروں نے فورم میں شرکت کی خواہش ظاہر کی تھی۔ خالد الفالح نے مزید کہا کہ اس فورم میں شریک سعودی حکومت کے 20 ادارے اور نجی سیکٹر کی 100 سے زیادہ کمپنیاں نہ صرف مملکت میں مثالی کارکر دگی کی حامل ہیں بلکہ عالمی سطح پر بھی ان کی قابل ذکر سرمایہ کاری ہے۔ سعودی ٹیلی کام کمپنی’’ ایس ٹی سی ‘‘ اور’’ علم‘‘ و ’’سائبر‘‘ کی جانب سے شام میں 4 ارب ریال کی سرمایہ کاری کے معاہدے کئے جائیں گےجو ڈیجیٹل انفراسڑکچر اور سائبر سکیورٹی کے علاوہ مصنوعی ذہانت کے شعبوں میں کام کریں گی۔
انہوں نے کہا کہ شام کی تعمیر نو کے حوالے سے 11 ارب ریال کے سرمایے سے شام میں 3 نئی سیمنٹ فیکٹریاں قائم کی جائیں گی جو شام میں تعمیراتی شعبے کے لئے نہایت اہم ثابت ہوں گی۔ سعودی وزیر سرمایہ کاری نے کہا کہ سعودی عرب کی جانب سے بین الاقوامی سرمایہ کاروں کو بھی شام میں توانائی اور صنعت سمیت مختلف شعبوں میں سرمایہ کاری کرنے کی ترغیب دی جائے گی۔
ان تمام مقاصد کے حصول کے لئے سعودی ولی عہد کی ہدایات کے تحت سعودی شامی بزنس کونسل قائم کی گئی ہے جس کی سربراہی اکواپاور کمپنی کے سی ای او محمد عبداللہ ابونیان کریں گے جبکہ کونسل کے ایگزیکٹو ممبران میں نمایاں سعودی سرمایہ کار اور تاجر شامل ہیں۔
