امریکی صدر ڈونلڈ ٹرمپ اور یورپی یونین کی صدر ارسلا فان ڈیر لین کے درمیان تجارتی معاہدے کے لیے ملاقات اتوار کو ہو گی

برسلز۔26جولائی (اے پی پی):امریکی صدر ڈونلڈ ٹرمپ اور یورپی یونین کی صدر ارسلا فان ڈیر لین (کل) اتوار کو اسکاٹ لینڈ میں ملاقات کریں گے تاکہ مہینوں سے جاری ٹرانس اٹلانٹک تجارتی تنازعہ کو حل کرنے کے لیے فیصلہ کن کوشش کی جا سکے۔اے ایف پی کے مطابق ارسلا فان ڈیر لین نے سوشل میڈیا پلیٹ فارم ایکس پر اپنی پوسٹ میں کہا کہ صدر ٹرمپ سے اچھی گفتگو کے بعد ہم نے اتوار کو اسکاٹ لینڈ میں ملاقات پر اتفاق کیا ہے تاکہ ٹرانس اٹلانٹک تجارتی تعلقات پر بات ہو اور انہیں مضبوط رکھا جا سکے۔

ڈونلڈ ٹرمپ نے پریسٹوک ایئرپورٹ پر صحافیوں سے گفتگو میں ملاقات کی تصدیق کرتے ہوئے کہاکہ اتوار کو یورپی یونین سربراہ کے ساتھ ملاقات کروں گا اور ہم ایک معاہدے پر بات کریں گے، ارسلاڈیر لین یہاں ہوں گی ، وہ ایک باوقار خاتون ہیں، ہم اس ملاقات کے منتظر ہیں۔امریکی صدر نے کہا کہ معاہدہ طے پانے کے امکانات ففٹی ففٹی ہیں کیونکہ 20 نکات پر اب بھی اختلافات موجود ہیں۔انہوں نے کہا کہ اگر ہم یہ معاہدہ کر لیتے ہیں تو یہ اب تک کا سب سے بڑا معاہدہ ہو گا۔یہ اعلیٰ سطحی ملاقات ان مذاکرات کے بعد ہو رہی ہے جو کئی مہینوں سے یورپی یونین اور امریکی تجارتی حکام کے درمیان جاری تھے اور حالیہ دنوں میں ایسے اشارے ملے کہ دونوں فریق معاہدے کے قریب پہنچ چکے ہیں۔

یورپی سفارتی ذرائع کے مطابق زیر غور معاہدے میں یورپی مصنوعات پر 15 فیصد امریکی ٹیرف شامل ہو سکتا ہے جو اس ہفتے جاپان کے ساتھ طے شدہ سطح کے برابر ہوگا جبکہ بعض اہم شعبوں کو اس سے استثنیٰ بھی دیا جا سکتا ہے۔ارسلا فان ڈیر لین کی ترجمان پاؤلا پینہو نے بتایا کہ اتوار کی ملاقات سے پہلے تکنیکی اور سیاسی سطح پر انتہائی سنجیدہ مذاکرات جاری رہے ہیں۔انہوں نے مزید کہاکہ اب رہنما موجودہ صورتحال کا جائزہ لیں گے اور ایک متوازن نتیجے کی گنجائش پر غور کریں گے جو دونوں اطراف کے کاروباروں اور صارفین کے لیے استحکام اور پیش گوئی کا باعث بنے۔