خاتون اول آصفہ بھٹو زرداری کی امدادی کارکنوں کی تعریف ، مشکل میں قومی یکجہتی کا مطالبہ

اسلام آباد۔16اگست (اے پی پی):خاتون اول اور رکن قومی اسمبلی بی بی آصفہ بھٹو زرداری نے خیبر پختونخوا(کے پی کے) میں شدید سیلاب پر اپنے دلی دکھ کا اظہار کرتے ہوئے دلیر رضاکاروں اور امدادی کارکنوں کو سچے ہیرو قرار دیتے ہوئے ان کی تعریف کی اور ضرورت مندوں کو بچانے میں ہر ممکن مدد فراہم کرنے کے لئے متحد کوششوں پر زور دیا۔

ہفتہ کو میڈیا چینلز کیلئے اپنے ایک خصوصی پیغام میں خاتون اول بی بی آصفہ بھٹو زرداری نے کے پی کے میں جاری سیلابی بحران میں ریسکیورز کی بہادرانہ کوششوں کو سراہا۔انہوں نے ان لوگوں کی بے لوث بہادری کو سراہا جو جان بچانے اور متاثرہ کمیونٹیز کو ریلیف فراہم کرنے کے لیے انتھک محنت کر رہے ہیں۔

آصفہ بھٹو زرداری نے قومی یکجہتی ، شہریوں، تنظیموں اور حکام پر زور دیا کہ وہ متحد ہوں اور سیلاب سے ہونے والی تباہی کو کم کرنے اور جلد بحالی کو یقینی بنانے کے لیے ہر ممکن تعاون کو یقینی بنائیں۔انہوں نے اس بات پر روشنی ڈالی کہ اس طرح کی آفات کی بڑھتی ہوئی تعداد کے پیچھے موسمیاتی تبدیلی ایک بڑا عنصر ہے اور اس کے اثرات سے نمٹنے کے لیے فوری اجتماعی کارروائی کی ضرورت ہے۔

انہوں نے عوام پر زور دیا کہ محتاط رہیں، امدادی ٹیموں کے ساتھ مکمل تعاون کریں اور حفاظتی ہدایات پر عمل کریں تاکہ مزید نقصان کو کم سے کم کیا جا سکے اور متاثرہ کمیونٹیز کی تیزی سے بحالی کو یقینی بنایا جا سکے۔انہوں نے سیلاب سے متاثرہ علاقوں میں متاثرین کے خاندانوں کے لئے دلی دعا کی اور یکجہتی کا اظہار کیا۔آصفہ بھٹو زرداری نے یقین دلایا کہ اس تباہ کن بحران کو برداشت کرنے والوں کی حمایت جاری رکھی جائے گی۔