امریکا میں پاکستان کے سفیر رضوان سعید شیخ نے ٹیکس ورلڈ نیو یارک سٹی 2025 سمر شو میں پاکستانی سٹالز کا افتتاح کیا

نیویارک۔19ستمبر (اے پی پی):امریکا میں پاکستان کے سفیر رضوان سعید شیخ نے ٹیکس ورلڈ نیو یارک سٹی 2025 سمر شو میں پاکستانی سٹالز کا افتتاح کیا، ہرسال دوبار منعقد کی جانے والی یہ تقریب عالمی ٹیکسٹائل مینوفیکچررز، فیبرک سورسنگ کمپنیوں اور یو ایس مارکیٹ کے خریداروں سے فیبرک سپلائی کرنے والوں کے درمیان روابط کا موقع فراہم کرتی ہے۔

اس موقع پر نیویارک میں پاکستان کے قونصل جنرل عامر احمد اتوزئی اور تجارتی و سرمایہ کاری کے قونصلر عدنان اعوان بھی پاکستانی سفیر کے ہمراہ تھے۔ پاکستان کی 6 معروف ٹیکسٹائل کمپنیاں نمائش میں شرکت کر رہی ہیں، جو پاکستان میں تیار کردہ ملبوسات اور کپڑوں کی متنوع رینج کی نمائش کر رہی ہیں۔ٹیکس ورلڈ نیو یارک سٹی 2025 امریکا کے مشرقی ساحل پر ٹیکسٹائل اور ملبوسات کا سب سے بڑا تجارتی شو، عالمی ٹیکسٹائل مینوفیکچررز، پائیدار فیبرک سپلائرز اور پوری امریکی مارکیٹ سے خریداروں کو جوڑنے والے ایک اہم پلیٹ فارم کے طور پر کام کرتا ہے۔

نیو یارک سٹی میں منعقد ہونے والا یہ ایونٹ سینکڑوں بین الاقوامی نمائش کنندگان کو اکٹھا کرتا ہے تاکہ ٹیکسٹائل اور ملبوسات کی صنعت میں جدت، اخلاقی سورسنگ اور جدید حل کو فروغ دیا جا سکے۔امریکا میں پاکستان کے سفیر رضوان سعید شیخ نے نمائش میں شریک پاکستانی کمپنیوں کی کوششوں کو سراہتے ہوئے ان پر زور دیا کہ وہ ایسی تقریبات میں بھرپور نمائندگی برقرار رکھیں۔انہوں نے پاکستان کے عالمی سطح پر تسلیم شدہ ٹیکسٹائل سیکٹر پر روشنی ڈالی، برآمدات کو بڑھانے اور ملک کے لئے زرمبادلہ کمانے میں اس کے اہم کردار پر زور دیا۔پاکستانی سفیر نے سفارت خانے کی فعال تجارتی سفارت کاری پر بھی زور دیا اور برآمد کنندگان کو واشنگٹن ڈی سی میں پاکستان کے تجارتی و تجارتی ونگ اور نیویارک میں قونصلیٹ جنرل کے مکمل تعاون کا یقین دلایا۔