4.5 ملین سے زیادہ والدین نے ایچ پی وی ویکسین لگوانے کی حامی بھر کر اپنی بیٹیوں کو سروائیکل کینسر سے بچانے کا فیصلہ کیا ہے، وزیر مملکت قومی صحت ڈاکٹر ملک مختار احمد بھرتھ کا ایچ پی وی ویکسینیشن سائٹ کے دورہ کے موقع پر گفتگو

اسلام آباد۔24ستمبر (اے پی پی):وزیر مملکت برائے قومی صحت ڈاکٹر ملک مختار احمد بھرتھ نے کہا ہے کہ 4.5 ملین سے زیادہ والدین نے ایچ پی وی ویکسین لگوانے کی حامی بھر کر اپنی بیٹیوں کو سروائیکل کینسر سے بچانے کا فیصلہ کیا ہے جو صحت مند مستقبل کے لیے اعتماد اور عزم کا ایک طاقتور ثبوت ہے، یہ تعداد ہر روز بڑھتی جارہی ہے کیونکہ قومی مہم 27 ستمبر 2025ء تک جاری ہے۔

ان خیالات کا اظہار انہوں نے اسلام آباد ماڈل سکول فار گرلز (آئی ایم ایس جی) میں ایچ پی وی ویکسینیشن سائٹ کا دورہ کرتے ہوئے کیا تاکہ صحت عامہ کی اس تاریخی کوشش کو عملی جامہ پہنایا جا سکے۔

اس دورے کا اہتمام یونیسیف نے فیڈرل ڈائریکٹوریٹ آف امیونائزیشن (ایف ڈی آئی، ایم او این ایچ ایس آر اینڈ سی) کے تعاون سے کیا تھا۔تقریب کے شرکا میں فیڈرل ڈائریکٹوریٹ آف امیونائزیشن (ایف ڈی آئی) کی ڈائریکٹر جنرل ڈاکٹر صوفیہ یونس، ڈائریکٹر (ٹیکنیکل) ایف ڈی آئی اسلام آباد ڈاکٹر خرم اکرم، نائب ملکی نمائندہ یونیسیف پاکستان شرمیلا رسول، ڈبلیو ایچ او کی نائب نمائندہ پاکستان ایلن تھون اور ڈسٹرکٹ ہیلتھ آفیسر (ڈی ایچ او) ڈاکٹر راشدہ بتول اور اسسٹنٹ کمشنر آئی سی ٹی مہرین بلوچ شامل تھے۔

انہوں نے اجتماعی طور پر ہر 9 سال سے 14 سال تک کی بچیوں کو سروائیکل کینسر سے بچانے اور اگلی نسل کے صحت مند مستقبل کو یقینی بنانے کے پاکستان کے مشن کو آگے بڑھانے کے اپنے غیر متزلزل عزم کا اعادہ کیا۔ انہوں نے کہا کہ یہ مہم ویکسینیشن مہم سے کہیں زیادہ ہے ، یہ ہماری بیٹیوں کے صحت مند مستقبل کا وعدہ ہے، ہر لڑکی جس کی ٹیکہ کاری کی گئی ہے وہ زندگی کی حفاظت کرتی ہے، ایک خاندان محفوظ ہے اور مستقبل محفوظ ہے۔

انہوں نے اس بات پر روشنی ڈالی کہ سروائیکل کینسر پاکستان میں خواتین میں تیسرا سب سے عام کینسر ہے جہاں تین میں سے دو خواتین زندہ نہیں رہ سکتیں۔

انہوں نے زور دے کر کہا کہ ایچ پی وی ویکسین سروائیکل کینسر کو روکنے اور زندگیاں بچانے کے لیے ایک محفوظ، موثر اور سائنسی طور پر ثابت شدہ حل ہے۔

بیماریوں کے کنٹرول اور روک تھام کے امریکی مراکز کا حوالہ دیتے ہوئے انہوں نے اس بات پر زور دیا کہ لڑکیوں میں ایچ پی وی کوریج میں اضافہ کسی بھی دوسرے حفاظتی ٹیکوں کی سرگرمی کے مقابلے میں فی شخص زیادہ اموات کو روکتا ہے۔

والدین کو یقین دلاتے ہوئے ملک مختار احمد بھرتھ نے اس بات پر زور دیا کہ ایچ پی وی ویکسین حلال ہے جس کی سرکردہ اسلامی سکالرز نے توثیق کی ہے اور پہلے ہی مسلم اکثریتی ممالک جیسے سعودی عرب ، متحدہ عرب امارات ، ملائیشیا ، قطر ، بنگلہ دیش اور انڈونیشیا کے قومی حفاظتی ٹیکوں کے نظام الاوقات کا حصہ ہے۔ اپنی بیٹیوں کو قابل تدارک بیماری سے بچانا اخلاقی اور مذہبی فریضہ ہے۔پ

پاکستان کی ایچ پی وی ویکسینیشن مہم عالمی ادارہ صحت کے سروائیکل کینسر کے خاتمے کے اقدام کے ساتھ منسلک ہے جس کا مقصد اس بات کو یقینی بنانا ہے کہ 2030ء تک دنیا بھر میں 90 فیصد لڑکیوں کو 15 سال کی عمر تک ایچ پی وی کے خلاف ویکسین لگائی جائے۔

مہم کو تین مراحل میں نافذ کیا جا رہا ہے، پہلا مرحلہ جو 15 سے 27 ستمبر 2025ء تک جاری رہے گا، پنجاب، سندھ، آزاد جموں و کشمیر اور اسلام آباد کیپیٹل ٹیریٹری کا احاطہ کر رہا ہے۔

فیز ٹو 2026ء میں خیبر پختونخوا تک کوششوں کو وسعت دے گا اور فیز تھری 2027ء میں بلوچستان اور گلگت بلتستان پہنچے گا۔اس کا مقصد 2025ء کے آخر تک فیز 1 کے علاقوں میں 9 سے 14 سال کی عمر کی 90 فیصد لڑکیوں کو ویکسین لگانا ہے اور آنے والے سالوں میں معمول کی حفاظتی ٹیکوں کے ذریعے اعلی کوریج کو برقرار رکھنا ہے۔

ڈاکٹر مختار احمد بھرتھ نے وزارت قومی صحت خدمات، فیڈرل ڈائریکٹوریٹ آف امیونائزیشن، ڈبلیو ایچ او، یونیسیف، جی اے وی آئی، صوبائی محکمہ صحت، اساتذہ، فرنٹ لائن ہیلتھ ورکرز، کمیونٹی موبلائزرز، سول سوسائٹی کی تنظیموں اور مذہبی رہنمائوں کی انتھک لگن کی تعریف کی۔

انہوں نے والدین اور کمیونٹی پر اثر انداز ہونے والوں کی بھی تعریف کی جو دوسروں کو اپنی بیٹیوں کو ویکسین لگانے کی ترغیب دے رہے ہیں۔

اپنے اختتامی کلمات میں ڈاکٹر مختار احمد بھرتھ نے تمام والدین سے اس قومی کوشش میں شامل ہونے کی اپیل کی اور کہا کہ ایچ پی وی ویکسین محفوظ، مفت اور ہر اہل لڑکی کے لیے دستیاب ہے۔

آج ان کی صحت کی حفاظت کرکے ہم ان کی تعلیم ، ان کے مستقبل اور معاشرے میں اپنا کردار ادا کرنے کی ان کی صلاحیت کی حفاظت کر رہے ہیں، آئیے ہم اس کو اس وقت تک جاری رکھیں جب تک کہ ہر اہل لڑکی تک نہ پہنچ جائیں۔