اسلام آباد۔25اکتوبر (اے پی پی):اسلام آباد چیمبر آف کامرس اینڈ انڈسٹریز (آئی سی سی آئی)کے قائم مقام صدر طاہر ایوب نے کہا ہے کہ کیپٹل ڈویلپمنٹ اتھارٹی (سی ڈی اے)دارالحکومت کی فروٹ اینڈ ویجیٹیبل مارکیٹ میں کمرشل عمارتوں کے اضافی سٹوری چارجز معقول بنا کر اور بنیادی انفراسٹرکچر کی اپ گریڈیشن تیز کرتے ہوئے کاروبار دوست اصلاحات متعارف کرائے۔ ہفتے کوچیمبر کا دورہ کرنے والے مختلف تجارتی وفود سے بات …
سی ڈی اے فروٹ اینڈ ویجیٹیبل مارکیٹ میں کمرشل عمارتوں کے اضافی سٹوری چارجز معقول، بنیادی انفراسٹرکچر اپ گریڈ کرکے کاروبار دوست اصلاحات متعارف کرائے، آئی سی سی آئی
مزید خبریں
اسلام آباد۔25اکتوبر (اے پی پی):اسلام آباد چیمبر آف کامرس اینڈ انڈسٹریز (آئی سی سی آئی)کے قائم مقام صدر طاہر ایوب نے کہا ہے کہ کیپٹل ڈویلپمنٹ اتھارٹی (سی ڈی اے)دارالحکومت کی فروٹ اینڈ ویجیٹیبل مارکیٹ میں کمرشل عمارتوں کے اضافی سٹوری چارجز معقول بنا کر اور بنیادی انفراسٹرکچر کی اپ گریڈیشن تیز کرتے ہوئے کاروبار دوست اصلاحات متعارف کرائے۔ ہفتے کوچیمبر کا دورہ کرنے والے مختلف تجارتی وفود سے بات چیت کرتے ہوئے انہوں نے تجارتی ڈھانچے پر ایک اضافی منزل کی تعمیر کے لیے سی ڈی اے کے اصولی فیصلے کو سراہتے ہوئے کہا کہ ا س سے جگہ کی شدید کمی کو دور کیا جا سکے گا۔
انہوں نے کہا کہ اس سہولت کے لیے موجودہ فی مربع فٹ کی شرح بہت سے تاجروں بالخصوص چھوٹے اور درمیانے درجے کے کاروباری اداروں (ایس ایم ایز)کے لیے ناقابل عمل ہے۔ انہوں نے ان چارجز پر حقیقت پسندانہ نظرثانی پر زور دیا تاکہ کاروبار کی توسیع کو ممکن بنایا جا سکے ۔ پھلوں اور سبزیوں کی منڈی میں بڑھتے تجارتی حجم کی طرف توجہ دلاتے ہوئے انہوں نے کارکردگی بہتر بنانے اور بڑھتی تجارتی سرگرمیوں کو ایڈجسٹ کرنے کے لیے نئے اور جدید سہولتوں سے مزین نیلامی والے علاقوں کی ضرورت پر زور دیا۔انہوں نے تجویز پیش کی کہ سی ڈی اے بھاری گاڑیوں اور 40 فٹ کے کنٹینرز کے لیے مخصوص پلیٹ فارم تیار کرے تاکہ ٹریفک کی بھیڑ کو کم کیا جا سکے اور لاجسٹک آپریشنز کو بہتر بنایا جا سکے۔
طاہر ایوب نے اوپن ٹرک آکشن زون بنانے کے لیے مارکیٹ کی حدود میں ملحقہ خالی یا زیر استعمال زمین کو شامل کرنے کی تجویز بھی پیش کی۔ انہوں نے کہا کہ مارکیٹ کے بنیادی ڈھانچے کو جدید بنانا نہ صرف تاجروں کی سہولت کو بہتر بنانے کے لیے ضروری ہے بلکہ اسلام آباد کی فوڈ سپلائی چین کو مضبوط بنانے کے لیے بھی ضروری ہے جو روزانہ ہزاروں خوردہ فروشوں اور صارفین کو خدمات فراہم کرتی ہے۔آئی سی سی آئی کے تعاون پر مبنی پالیسی کے عزم کا اعادہ کرتے ہوئے قائم مقام صدر نے کہا کہ چیمبر عملی حل کے لیے سی ڈی اےاور دیگر سٹیک ہولڈرز کے ساتھ مل کر کام کرنے کے لیے پرعزم ہے۔
