پاکستان مارشل آرٹس ایسوسی ایشن اور فاطمہ جناح میڈیکل یونیورسٹی کے اشتراک سے خواتین کیلئے سیلف ڈیفنس تربیتی ورکشاپ کا انعقاد

اسلام آباد۔3نومبر (اے پی پی):پاکستان مارشل آرٹس ایسوسی ایشن نے فاطمہ جناح میڈیکل یونیورسٹی (ایف جے ایم یو)کے اشتراک سے یونیورسٹی کیمپس میں خواتین کے لیے ایک موثر اور انقلابی نوعیت کی سیلف ڈیفنس تربیتی ورکشاپ کا انعقاد کیا۔یہ ورکشاپ بزنس انکیوبیشن سینٹر جدات کے اشتراک سے منعقد ہوئی جس کی سرپرستی پروفیسر ڈاکٹر تسکین زہرہ نے کی۔ اس ورکشاپ کا مقصد خواتین میڈیکل طالبات اور نوجوان ڈاکٹروں کو ہنگامی حالات میں خود کو محفوظ رکھنے کے لیے زندگی بچانے والی دفاعی مہارتوں، ہوشیاری اور اعتماد سے لیس کرنا تھا۔تقریب کا افتتاح وائس چانسلر ایف جے ایم یو پروفیسر ڈاکٹر خالد مسعود گوندل (تمغہ امتیاز، پرائیڈ آف پرفارمنس)نے کیا۔

انہوں نے اس اشتراک کو سراہتے ہوئے کہا کہ خواتین کو عملی سیلف ڈیفنس علم فراہم کرنا نہایت ضروری ہے تاکہ وہ اپنی حفاظت کے ساتھ پیشہ ورانہ میدان میں بھی پراعتماد رہ سکیں۔ انہوں نے پاکستان مارشل آرٹس ایسوسی ایشن کے ملک گیر اقدامات کو بھی سراہا جو خواتین میں حوصلہ، ہمت اور خود اعتمادی کو فروغ دے رہے ہیں۔ورکشاپ کی تربیت سینسے انور محی الدین (صدر و چیف ٹرینر پی ایم اے اے) نے دی جس میں کراو ماگا، کک باکسنگ، آئی کیڈو اور کیوکشن کراٹے کی عملی مشقیں شامل تھیں۔ شرکا کو کندھے سے گرفت چھڑانے، موثر حملوں سے بچائو اور اسلحہ چھیننے یا قابو کرنے کی تکنیکیں سکھائی گئیں۔

تربیت کے دوران حقیقت پر مبنی دفاعی حکمت عملیوں پر زور دیا گیا تاکہ خواتین اپنی روزمرہ زندگی میں محفوظ رہ سکیں۔تربیتی نشستوں میں سمپائی ہنزلہ محی الدین، زینب سلطان، سمعیہ اور سارہ یعقوب سمیت دیگر تربیت یافتہ انسٹرکٹرز نے معاونت فراہم کی۔ شرکا نے غیر معمولی جوش و خروش کا مظاہرہ کیا جسے منتظمین اور اساتذہ نے سراہا۔ورکشاپ کا سب سے دلچسپ اور جرات مندانہ لمحہ اس وقت آیا جب زینب طارق اور حفصہ فاطمہ نے ایک خطرناک مظاہرہ پیش کیا۔

وہ زمین پر لیٹ گئیں اور سینسے انور محی الدین نے ان کے پیٹ پر رکھی بھاری پتھر کی سل کو ہتھوڑے سے توڑ کر حاضرین کو حیران کر دیا۔ یہ مظاہرہ حوصلے، مہارت اور اعتماد کی بہترین مثال تھا۔اختتامی تقریب میں سینسے انور محی الدین نے نوجوان منتظمین ماہ نور شوال اور آمنہ تزین سمیت ایف جے ایم یو انتظامیہ کا شکریہ ادا کیا اور اس عزم کا اظہار کیا کہ پی ایم اے اے ملک بھر میں اپنی قومی سیلف ڈیفنس تربیتی مہم کے ذریعے خواتین کو بااختیار بنانے کا سلسلہ جاری رکھے گا۔یہ ورکشاپ صرف ایک تربیتی سیشن نہیں بلکہ خواتین کے حوصلے، خود اعتمادی اور خود انحصاری کا جشن تھی جس نے نوجوان خواتین میں اعتماد اور طاقت کا نیا جذبہ پیدا کیا۔