پاکستان کی ڈیجیٹل و صنعتی ترقی کی جانب تاریخی کامیابی ، ملک کی پہلی کروم بک اسمبلی لائن کا آغاز ، حکومت اور گوگل نے مشترکہ طور پر تبدیلی کا سنگ میل عبور کرلیا

اسلام آباد۔4نومبر (اے پی پی):پاکستان نے ڈیجیٹل و صنعتی ترقی کی جانب اہم کامیابی حاصل کرلی،حکومت پاکستان اور گوگل نے مشترکہ طور پر ڈیجیٹل تبدیلی کا سنگ میل عبور کرلیا جس میں ملک کی پہلی کروم بک اسمبلی لائن کا آغاز اور پاکستان میں مضبوط مقامی موجودگی کے لئے اس کے منصوبے شامل ہیں۔نائب وزیر اعظم و وزیر خارجہ سینیٹر محمد اسحاق ڈار نے وزارت انفارمیشن ٹیکنالوجی و ٹیلی کمیونیکیشن ، وزارت دفاعی پیداوار اور خصوصی سرمایہ کاری سہولت کونسل (ایس آئی ایف سی )کے گوگل اور اس کے پارٹنر ٹیک ویلی کے تعاون سے وزیراعظم سیکرٹریٹ آڈیٹوریم میں پاکستان کی پہلی کروم بک اسمبلی لائن کا افتتاح کیا۔

تقریب سے خطاب کرتے ہوئے نائب وزیراعظم و وزیر خارجہ سینیٹر اسحاق ڈار نے کہا کہ پاکستان کے قومی ڈیجیٹل تبدیلی کے ایجنڈے کی رہنمائی کرنے والے وزیر اعظم کے وژن اور قیادت کے ساتھ حکومت ڈیجیٹل شمولیت اور اے آئی کے لئے تیار پاکستان کی تعمیر کے لئے پرعزم ہے جسے ہم فخر کے ساتھ ڈیجیٹل نیشن پاکستان کہتے ہیں، یہ وژن ہمارے نوجوانوں کو ڈیجیٹل مہارتوں سے بااختیار بنانے اور انہیں جدید ٹولز سے آراستہ کرنے کے ہمارے عزم کی عکاسی کرتا ہے اور گوگل کے پاکستان میں مقامی طور پر مواقع تک رسائی کو یقینی بنانے کے لئے اس کی مقامی سطح پر رسائی کو یقینی بناتا ہے،یہ قومی فخر کا لمحہ ہے اور ہمارے ملک کی ڈیجیٹل صلاحیت کی ایک طاقتور توثیق کا یہ سنگ میل ہماری ڈیجیٹل معیشت کے لیے ایک اہم قدم کی نمائندگی کرتا ہے جس سے پاکستان کے اختراعی ماحولیاتی نظام کو تقویت ملتی ہے اور ہماری تیزی سے ترقی پذیر ٹیکنالوجی کے منظر نامے پر عالمی سرمایہ کاروں کے اعتماد میں اضافہ ہوتا ہے۔

تقریب سے خطاب کرتے ہوئے آئی ٹی اور ٹیلی کمیونیکیشن کی وزیر شزہ فاطمہ خواجہ نے کہا کہ آج کا دن پاکستان کی ڈیجیٹل تبدیلی کا اہم لمحہ ہے، وزیر اعظم کے ڈیجیٹل نیشن وژن کے مطابق ہم اپنے نوجوانوں کو مہارتوں اور آلات کے ساتھ بااختیار بنانے کے ساتھ ساتھ گھریلو ہارڈ ویئر کو بھی تیار کر رہے ہیں تاکہ ہمارے نوجوانوں کو مہارتوں اور آلات کے ساتھ ہم آہنگ کیا جا سکے، تعلیم، ٹیکنالوجی اور مقامی طور پر اسمبل شدہ سستی کرو م بکس کو ایک ساتھ لاتے ہوئے مستقبل کے لئے اے آئی فعال ڈیجیٹل نیشن کے ہمارے ہدف کو آگے بڑھاتا ہے۔

وزیر برائے دفاعی پیداوار رضا حیات نے اس اقدام کی صنعتی اہمیت پر روشنی ڈالتے ہوئے کہا کہ وزارت دفاعی پیداوار نے اپنے ایک محکمے کے طور پر اہم کردار ادا کیا ہے ،نیشنل ریڈیو اینڈ ٹیلی کمیونیکیشن کارپوریشن نے پاکستان میں پہلی کروم بک اسمبلی لائن قائم کرنے کے لئے بھرپور طریقے سے کام کیا ہے، یہ مشترکہ منصوبہ روزگار کے مواقع پیدا کرنے، مقامی معیشت کو متحرک کرنے اور پاکستان کے اندر ڈیجیٹل تقسیم ختم کرنے میں اہم کردار ادا کرنے کی صلاحیت رکھتا ہے۔

کنٹری ڈائریکٹر گوگل پاکستان فرحان قریشی نے کہاکہ ہم لوگوں، مہارتوں اور اختراع میں اپنی سرمایہ کاری کو مزید گہرا کرنے کے لئے پرجوش ہیں تاکہ ملک کی وسیع صلاحیت کو کھولنے اور اے آئی سے چلنے والی اس معیشت میں ایک جامع ڈیجیٹل مستقبل کی تعمیر میں مدد ملے، جیسے جیسے ہمارا کام پاکستان میں بڑھتا جا رہا ہے ہم یہاں مضبوط مقامی موجودگی کے لئے کام کر رہے ہیں جو جدت، شراکت داری اور اقتصادی مواقع کے لئے ایک نوڈ کے طور پر کام کرے گا۔

تقریب میں نائب وزیراعظم سینیٹر محمد اسحاق ڈار ،وفاقی وزرا محمد اورنگزیب (خزانہ)، احسن اقبال (منصوبہ بندی، ترقی و خصوصی اقدامات)، شزہ فاطمہ خواجہ (انفارمیشن ٹیکنالوجی اینڈ ٹیلی کمیونیکیشن) اور محمد رضا حیات ہراج (دفاعی پیداوار)، سرمایہ کاری بورڈ کے وزیر قیصر شیخ، وزیر تعلیم پنجاب ، نیشنل کوآرڈینیٹر، خصوصی سرمایہ کاری سہولت کونسل (ایس آئی ایف سی)، سندھ کے وزیر برائے آئی ٹی علی رشید اور سیکرٹری آئی ٹی ضرار ہشام خان سمیت سینئر حکومتی اور صنعتی قیادت نے شرکت کی۔

تقریب میں امریکی سفار خانے کی قائم مقام ناظم الامور نٹالی بیکر اور ڈیجیٹل میڈیا کے بارے میں وزیراعظم کے معاون خصوصی فہد ہارون بھی موجود تھے۔ٹیکنالوجی پارٹنرز کی جانب سے گوگل فار ایجوکیشن کے منیجنگ ڈائریکٹر کیون کیلز نے شرکت کی۔ اس موقع پر گوگل، ٹیک ویلی، الائیڈ آسٹریلیا، این آر ٹی سی کے نمائندے، ایس آئی ایف سی اور وزارت آئی ٹی اینڈ ٹیلی کام کے حکام بھی موجود تھے۔یہ اقدام پاکستان کے سافٹ ویئر کی جدت سے لے کر مقامی ہارڈ ویئر کی پیداوار تک کے سفر میں تاریخی پیشرفت کی نشاندہی کرتا ہے۔

اس اقدام کا مقصد طلبہ، معلمین اور پیشہ ور افراد کو جدید ڈیجیٹل ٹولز کے ساتھ بااختیار بنانے کے لئے سستی، محفوظ اور مقامی طور پر تیار کردہ کروم بکس فراہم کرنا ہے۔نیشنل ریڈیو اینڈ ٹیلی کمیونیکیشن کارپوریشن (این آر ٹی سی ) ہری پور سہولت پر مبنی نئی اسمبلی لائن 2026 تک سالانہ پانچ لاکھ کروم بکس تیار کرے گی۔ یہ آلات اعلیٰ معیار کے ، محفوظ اور سستے ہوں گے خاص طور پر تعلیمی اور پبلک سیکٹر کے استعمال کے لئے موزوں ہوں گے۔ 30 سال سے کم عمر کی 64فیصد آبادی کے ساتھ یہ اقدام نوجوانوں کو مستقبل کے لئے تیار ہنر سے آراستہ کرنے کی قومی کوششوں کی براہ راست حمایت کرتا ہے۔

یہ گوگل کے جاری ڈیجیٹل پروگراموں کی تکمیل کرتا ہے جو پہلے ہی 10 لاکھ پاکستانیوں کو تربیت دے چکے ہیں۔ ڈیجیٹل تقسیم کو ختم کرنے کے علاوہ یہ منصوبہ روزگار پیدا کرے گا، مقامی تکنیکی ماہرین کو تربیت دے گا اور وسیع تر اقتصادی ترقی میں حصہ ڈالے گا۔تقریب کے دوران گوگل نے مقامی کاروباروں کو زمینی مدد فراہم کرنے کے لئے اپنی مقامی موجودگی کو مزید گہرا کرنے کے منصوبوں کی نقاب کشائی کی جس سے انہیں اپنے آپریشنز کو بڑھانے اور عالمی منڈیوں تک پہنچنے میں مدد ملے گی۔ یہ ملک کے ڈیجیٹل سفر میں ایک اہم سنگ میل ہے۔

یہ فیصلہ پاکستان کی ٹیکنالوجی کی صلاحیت اور حکومت پاکستان کے فعال ڈیجیٹل تبدیلی کے ایجنڈے پر گوگل کے اعتماد کی عکاسی کرتا ہے جس کی قیادت وزارت آئی ٹی اور ٹیلی کمیونیکیشن ، وزارت دفاعی پیداوار اور خصوصی سرمایہ کاری سہولت کونسل کرتی ہے۔پاکستان ایک اہم موڑ پر ہےجو اپنے مقامی ٹیک ایکو سسٹم کو ترقی دے کر اور ڈیجیٹل مہارت کے بنیادی ڈھانچے میں سرمایہ کاری کرکے خود کو ایک بڑے برآمدی مرکز کے طور پر پیش کر رہا ہے۔

ماہرین کا منصوبہ ہے کہ موبائل ایپس، ڈیجیٹل سروسز اور سرحد پار ای کامرس کو وسعت دینے سے 2030 تک برآمدی حجم میں 6.6 ارب ڈالر کا اضافہ ہو سکتا ہے۔ کروم بک اسمبلی لائن اور گوگل کے مقامی دفتر جیسے اقدامات نوجوان پاکستانیوں کی صلاحیتوں اور مستقبل کے مواقع کے درمیان فرق کو ختم کرنے میں مدد کریں گے۔

این آر ٹی سی ہری پور میں کروم بک اسمبلی لائن مقامی مینوفیکچرنگ، سپلائی چین کی ترقی اور صنعتی صلاحیت کو فروغ دے گی جو براہ راست وزیراعظم کے ڈیجیٹل نیشن پاکستان ویژن اور نیشنل اے آئی پالیسی کے مقاصد کی حمایت کرے گی۔ یہ شراکت داری پاکستان کے اختراعی ماحولیاتی نظام پر عالمی اعتماد کی عکاسی کرتی ہے اور اس بات کی تصدیق کرتی ہے کہ ملک ٹیکنالوجی، سرمایہ کاری اور بین الاقوامی تعاون کے لئے کھلا ہے۔