یو اے ای کے نیشنل سینٹر آف میٹرولوجی کی ورلڈ سونامی اویئرنیس ڈے میں شمولیت

ابوظہبی۔5نومبر (اے پی پی):متحدہ عرب امارات کے نیشنل سینٹر آف میٹیورولوجی (این سی ایم) نے ورلڈ سونامی اویئرنیس ڈے میں شرکت کی جس کا مقصد عوام میں سونامی کے خطرات سے متعلق شعور اجاگر کرنا اور ان کے اثرات کو کم کرنے کے لیے تیاری اور آگاہی کو فروغ دینا ہے۔وام کے مطابق ورلڈ میٹرولوجیکل آرگنائزیشن (ڈبلیو ایم او) کے صدر اور این سی ایم کے ڈائریکٹر جنرل ڈاکٹر عبداللہ المندوس نے کہا کہ سونامی جیسی قدرتی آفات کے اثرات کو کم کرنے کے لیے علاقائی ہم آہنگی، عوامی آگاہی، اور موثر ابتدائی انتباہی نظام نہایت ضروری ہیں۔

انہوں نے زور دیا کہ ایسے اقدامات نہ صرف جان و مال کے تحفظ میں مدد دیتے ہیں بلکہ علاقائی سطح پر ہنگامی ردعمل کی صلاحیت کو بھی بہتر بناتے ہیں۔این سی ایم شمال مغربی بحرِ ہند کے ممالک کے لیے سونامی کے ابتدائی انتباہی نظام کو بہتر بنانے کے منصوبے میں فعال کردار ادا کر رہا ہے۔ادارہ تربیتی پروگرامز، آگاہی مہمات اور سائنسی اشتراک کے ذریعے خطے میں تیاری اور استعداد کار کو بڑھانے میں مصروف ہے۔

این سی ایم کی ورلڈ سونامی اویئرنیس ڈے میں شرکت اس بات کی عکاسی کرتی ہے کہ متحدہ عرب امارات عالمی برادری کے ساتھ مل کر کمیونٹیز کے تحفظ، علاقائی تعاون اور بین الاقوامی انتباہی نظاموں کے فروغ کے لیے پرعزم ہے۔