امریکا ، حکومتی شٹ ڈاؤن کے باعث2200پروازیں منسوخ

واشنگٹن۔10نومبر (اے پی پی):امریکا میں جاری حکومتی شٹ ڈاؤن کے باعث ایئرلائنز نے 2200 پروازیں منسوخ کر دیں۔ اردو نیوز کے مطابق وزیر مواصلات سیان ڈفی نے ایک پروگرام میں گفتگو کرتے ہوئے خبردار کیا کہ 27 نومبرکو تھینکس گیونگ ڈے کے موقع پر صورت حال مزید خراب ہو جائے گی۔ انہوں نے کہا کہ صورت حال صرف خرابی کی طرف جا رہی ہے جو کہ تھینکس گیونگ سے صرف دو ہفتے قبل کی ہے، آنے والے دنوں میں ہوائی سفر کا سلسلہ مزید سکڑ جائے گا۔ انہوں نے کہا کہ اگر صورت حال بحال نہیں ہوتی تو بہت سی پروازیں اڑان بھر ہی نہیں پائیں گی۔

انہوں نے کہا کہ یکم اکتوبر سے وفاقی شٹ ڈاؤن شروع ہونے کے بعد سے کئی ٹریفک کنٹرولرز کام چھوڑ چکے ہیں اور فیڈرل ایوی ایشن کو ایک ہزار سے دو ہزار تک کے سٹاف ارکان کی کمی کا سامنا ہے۔ انہوں نے کہا کہ انہوں نے تجربہ کار کنٹرولرز کو روکنے کے لئے ادائیگی کی اور ملازمت پر رہنے کا کہا، شٹ ڈاؤن شروع ہونے سے پہلے اوسطاً چار کنٹرولرز جاب چھوڑ رہے تھے جبکہ اب یہ تعداد 15 سے 20 تک پہنچ چکی ہے۔

شٹ ڈاؤن جو کہ 40ویں روز میں داخل ہو گیا ہے، کی وجہ سے ایئر ٹریفک کنٹرول کے عملے ارکان میں بھی کمی آئی ہے کیونکہ وفاقی ملازمین کو ہفتوں سے تنخواہ نہیں دی گئی۔ بہت سی فضائی کمپنیوں جیسے کہ یونائیٹڈ ایئرلائنز نے اپنی پراوزوں کی منسوخی کے حوالے سے منصوبہ بندی کر لی ہے ، کمپنی انتظامیہ کی جانب سے بتایا گیا ہے کہ اس نے پیر کے لئے 190 پروازیں کم کی ہیں جبکہ منگل کے لئے 269 پروازیں منسوخ کی گئی ہیں۔

گزشتہ روز سامنے آنے والے اعداد و شمار سے پتہ چلتا ہے کہ2ہزار 215 پروازیں منسوخ ہوئیں اور 7 ہزار 200 تاخیر کا شکار ہوئیں۔ اس سے قبل فیڈرل ایوی ایشن نے کہا تھا کہ اسے 12 ٹاورز کے لئے عملے کی کمی کے مسائل درپیش ہیں۔