امریکا میں حکومتی شٹ ڈاؤن کے باعث کم از کم 12 بڑے امریکی شہروں میں پروازیں تاخیر کا شکار ،عملے کی غیرحاضریوں میں اضافہ

واشنگٹن ۔10نومبر (اے پی پی):امریکا میں حکومتی شٹ ڈاؤن کے باعث کم از کم 12 بڑے امریکی شہروں میں پروازیں تاخیر کا شکار ہو رہی ہیں ،جس کی وجہ ایئر ٹریفک کنٹرول کے عملے کی شدید کمی ہے۔ برطانوی خبر رساں ادارے ’رائٹرز‘ کی رپورٹ کے مطابق فیڈرل ایوی ایشن ایڈمنسٹریشن (ایف اے اے) نے بتایا کہ ایئر ٹریفک کنٹرول کے عملے کی کمی 42 ایئرپورٹ ٹاورز اور دیگر مراکز کو متاثر کر رہی ہے، جس کے باعث کم از کم 12 بڑے امریکی شہروں (جن میں اٹلانٹا، نیوارک، سان فرانسسکو، شکاگو اور نیویارک شامل ہیں) میں پروازیں تاخیر کا شکار ہوئیں۔اس کے علاوہ، 6 مصروف فضائی راستوں پر گزرنے والی پروازیں بھی تاخیر کا سامنا کر رہی ہیں، ہفتے کے روز تقریباً ایک ہزار 500 پروازیں منسوخ اور 6 ہزار پروازیں تاخیر کا شکار ہوئیں، جب کہ گزشتہ جمعہ کو ایک ہزار 25 پروازیں منسوخ اور 7 ہزار تاخیر کا سامنا کر چکی تھیں۔ایئر لائن حکام نے کہا کہ اگر عملے کی کمی مزید بڑھ گئی تو پورا نظام کے مفلوج ہونے کا خدشہ ہے۔

ادھر ایف اے اے نے حفاظتی خدشات کے باعث جمعہ سے 40 بڑے ایئرپورٹس پر روزانہ کی پروازوں میں 4 فیصد کمی کرنے کی ہدایت دی ہے۔41 دن سے جاری شٹ ڈاؤن ایک ریکارڈ مدت ہے، ایئر ٹریفک کنٹرولرز کی شدید کمی کا باعث بنا ہے، جو دیگر وفاقی ملازمین کی طرح کئی ہفتوں سے تنخواہ حاصل نہیں کر پا رہے۔رپورٹ کے مطابق پروازوں میں کمی کو منگل کو 6 فیصد تک بڑھایا جائے گا، اور 14 نومبر تک 10 فیصد تک پہنچا دیا جائے گا۔عملے کی غیرحاضری کے باعث ایف اے اے نے ہفتے کے روز 9 ایئرپورٹس پر گراؤنڈ ڈیلے پروگرام نافذ کیے، جن میں اٹلانٹا (جو امریکا کے مصروف ترین ایئرپورٹس میں سے ایک ہے) پروازوں میں اوسط 282 منٹ کی تاخیر ریکارڈ کی گئی۔

یہ کمی جو جمعہ کی صبح شروع ہوئی تھی، 4 بڑی ایئر لائنز، امریکن ایئرلائنز، ڈیلٹا، ساؤتھ ویسٹ اور یونائیٹڈ ایئرلائنز کی تقریباً 700 پروازوں پر اثرانداز ہوئی،ان چاروں ایئرلائنز نے ہفتے کے روز تقریباً اتنی ہی پروازیں منسوخ کیں، لیکن عملے کی مزید کمی کی وجہ سے انہیں اضافی پروازیں بھی منسوخ کرنا پڑیں۔دریں اثنا ایف اے اے ایڈمنسٹریٹر برائن بیڈفورڈ نے بتایا کہ پچھلے چند دنوں میں 20 سے 40 فیصد کنٹرولرز ڈیوٹی پر نہیں آ رہے ۔ امریکی سینیٹ میں بحث کے دوران سینیٹر ٹیڈ کروز نےکہا کہ انہیں بتایا گیا ہے کہ شٹ ڈاؤن کے آغاز سے اب تک پائلٹس نے 500 سے زائد رضاکارانہ حفاظتی رپورٹس جمع کرائی ہیں، جن میں ایئر ٹریفک کنٹرولرز کی تھکن کے باعث ہونے والی غلطیوں کی نشاندہی کی گئی ہے۔

حکومتی شٹ ڈاؤن کے دوران 13 ہزار ایئر ٹریفک کنٹرولرز اور 50 ہزار سیکیورٹی اسکرینرز کو بغیر تنخواہ کے کام کرنے پر مجبور کیا گیا ہے، جس کے باعث غیرحاضریوں میں اضافہ ہوا ہے۔ کئی کنٹرولرز کو جمعرات کو بتایا گیا کہ انہیں اگلے ہفتے مسلسل دوسری بار تنخواہ نہیں دی جائے گی۔امریکی وزیرِ ٹرانسپورٹ شان ڈفی نے خبردار کیا کہ اگر مزید کنٹرولرز نے کام پر آنا بند کر دیا تو انہیں ایئر ٹریفک میں 20 فیصد کمی کرنی پڑ سکتی ہے۔انہوں نے کہا کہ میں اعداد و شمار کا جائزہ لے رہا ہوں، ہم فضائی حالات کے مطابق فیصلے کریں گے۔

ڈیموکریٹس کا کہنا ہے کہ شٹ ڈاؤن کی اصل وجہ ریپبلکنز کا ہیلتھ انشورنس سبسڈیز پر مذاکرات سے انکار ہے، جو اس سال کے آخر میں ختم ہو رہی ہیں۔تاہم گزشتہ روز وائٹ ہاؤس پہنچنے پر ڈونلڈ ٹرمپ نے صحافیوں سے گفتگو کرتے ہوئے کہا کہ ایسا لگتا ہے کہ ہم شٹ ڈاؤن کے خاتمے کے قریب پہنچ گئے ہیں۔یہ قانون سازی سینیٹ میں ابتدائی ووٹنگ کے لیے پیش کی جائے گی۔ سینیٹ سے منظوری کے بعد بل کو ریپبلکن اکثریت والے ایوانِ نمائندگان سے پاس ہونا ہو گا، جس کے بعد اسے صدر کے دستخط کے لیے بھجوایا جائے گا۔

قانون سازوں کے مطابق مجوزہ بل کے تحت فوڈ اسٹامپ پروگرام کے لیے فنڈنگ بحال کی جائے گی، جو 4 کروڑ 20 لاکھ سے زائد کم آمدنی والے امریکیوں کو غذائی اشیاء خریدنے میں مدد فراہم کرتا ہے۔ بل میں ٹرمپ کی جانب سے گزشتہ ماہ برطرف کیے گئے ہزاروں وفاقی ملازمین کی بحالی اور انہیں واجب الادا تنخواہیں دینے کی شق بھی شامل ہے۔تاہم سینیٹ کے بعض ڈیموکریٹ اراکین نے اس معاہدے پر تحفظات ظاہر کیے ہیں۔