پولینڈ نے بیلاروس کے ساتھ دو سرحدی گزرگاہیں دوبارہ کھول دیں

وارسا۔17نومبر (اے پی پی):پولینڈ نے بیلاروس کے ساتھ دو سرحدی گزرگاہیں دوبارہ کھول دیں۔ تاس کے مطابق بوبروونیکی گزرگاہ کاروں، بسوں اور ٹرکوں کے لیے کھول دی گئی ہے، جبکہ کُزنیتسا گزرگاہ فی الحال صرف کاروں کے لیے کھولی گئی ہے۔پولینڈ کے اس فیصلے کی وجہ سرحدی علاقوں کی معاشی ضروریات اور اس حقیقت کو قرار دیا گیا ہے کہ سرحد پر مہاجرین کے بحران میں نمایاں کمی آئی ہے۔

پولینڈ کے وزیرِ اعظم ڈونالڈ ٹسک نے 28 اکتوبر کو کہا تھا کہ ملک بیلاروس کے ساتھ بوبروونیکی اور کُزنیتسا گزرگاہیں دوبارہ کھولنے کے لیے تیار ہے۔ ان کے مطابق اکتوبر کے آخر میں اس اقدام کو اس لیے مؤخر کیا گیا تھا تاکہ اس بارے میں لیتھوانیا کے ساتھ ہم آہنگی کی جا سکے۔

واضح رہے کہ لیتھوانیائی حکام نے 28 اکتوبر کو اسمگلنگ کے خلاف کارروائی کے پیشِ نظر بیلاروس کے ساتھ اپنی سرحد نومبر کے آخر تک بند رکھنے کا فیصلہ کیا تھا۔