معروف سپورٹس سائیکالوجسٹ محسن نواز کا پاک فوج اور پنجاب حکومت کو لاہور میں تاریخی عالمی باکسنگ چیمپئن شپ کے انعقاد پر خراجِ تحسین

اسلام آباد۔3دسمبر (اے پی پی):معروف پاکستانی سپورٹس سائیکالوجسٹ، تمغہ امتیاز یافتہ اور انٹرنیشنل ایف کلاس لانگ رینج شوٹنگ چیمپئن محسن نواز نے لاہور میں منعقد ہونے والی دوسری ورلڈ انٹرنیشنل باکسنگ چیمپئن شپ کے شاندار انعقاد پر پاک فوج اور حکومتِ پنجاب کو زبردست خراجِ تحسین پیش کیا ہے۔ انہوں نے اس ایونٹ کو پاکستان کی عالمی کھیلوں کی ساکھ کے لئے بڑی کامیابی قرار دیا۔چار روزہ باوقار چیمپئن شپ ’’فائٹ فار گلوری‘‘ کے عنوان سے 26 سے 29 نومبر تک جناح سپورٹس کمپلیکس لاہور میں منعقد ہوئی جس میں 15 ممالک کے 44 عالمی معیار کے باکسرز نے حصہ لیا۔ اس ایونٹ نے پاکستان کے لئے ایک اہم سنگِ میل قائم کیا اور لاہور کو بین الاقوامی کامبیٹ اسپورٹس کا مرکز بنا دیا۔

چیمپئن شپ کے دوران گفتگو کرتے ہوئے محسن نواز نے کہا کہ کثیرالملکی کھیلوں کے ایونٹس کا انعقاد پاکستان کی عالمی شناخت کو مضبوط بنانے کے لئے نہایت ضروری ہے۔انہوں نے کہا کہ بطور سپورٹس سائیکالوجسٹ میرا پختہ یقین ہے کہ اس معیار کے بین الاقوامی مقابلے عالمی سطح پر پاکستان کے بارے میں رائے عامہ پر گہرا اثر ڈالتے ہیں، ہمیں ایسے مزید اقدامات کی ضرورت ہے جو ہماری پیشہ وارانہ صلاحیتوں، مہمان نوازی اور عالمی معیار کی تنظیمی قابلیت کو اجاگر کریں۔یہ چیمپئن شپ حکومت پنجاب، لاہور کور اور فوجی فاؤنڈیشن نے ورلڈ باکسنگ ایسوسی ایشن (WBA) کے اشتراک سے منعقد کی۔

اس میں امریکا، برطانیہ، جرمنی، جنوبی کوریا، آسٹریلیا، آئرلینڈ سمیت متعدد ممالک کے ممتاز باکسرز نے شرکت کی۔پاکستان کے نمایاں ایف کلاس شوٹر اور 10 بین الاقوامی تمغے حاصل کرنے والے محسن نواز نے خصوصی مہمان اور مبصر کے طور پر شرکت کی جہاں انہوں نے ایک ماہر اتھلیٹ اور سپورٹس سائیکالوجسٹ دونوں حیثیتوں سے قیمتی آراء پیش کیں۔ انہوں نے اس ایونٹ کو پاکستان کی ابھرتی ہوئی اسپورٹس انڈسٹری کے لئے ’’گیم چینجر‘‘ قرار دیا۔انہوں نے مزید کہا کہ مثالی ہم آہنگی، سخت حفاظتی انتظامات، غیر ملکی کھلاڑیوں کے لئے بہترین مہمان نوازی اور مجموعی انتظامات قابلِ تعریف تھے۔ پاک فوج کے لاہور کور اور حکومت پنجاب ایسے عالمی معیار کے ایونٹ کے انعقاد پر اعلیٰ ترین ستائش کے مستحق ہیں۔

چیمپئن شپ کے دوران محسن نواز نے برطانوی نژاد پاکستانی باکسنگ سٹار عامر خان، سابق کرکٹر شاہد آفریدی، عظیم بلے باز انضمام الحق سمیت کئی عالمی کھلاڑیوں سے ملاقات بھی کی۔ انہوں نے اس تجربے کو متاثرکن اور پیشہ وارانہ طور پر نہایت مفید قرار دیتے ہوئے کہا کہ کھیلوں کی عظیم شخصیات سے ملاقات اور ایسے بڑے مقابلے کا مشاہدہ واقعی یادگار تھا۔ یہ بین الاقوامی کھیلوں میں پاکستان کے بڑھتے ہوئے اثر و رسوخ کی عکاسی کرتا ہے۔

نوجوانوں پر اس کے مثبت اثرات پر بات کرتے ہوئے انہوں نے کہا کہ ایسے ایونٹس نوجوانوں کی ذہنی نشوونما، حوصلہ افزائی اور قومی وقار کے فروغ میں اہم کردار ادا کرتے ہیں،جب نوجوان اپنے ملک میں عالمی کھلاڑیوں کو کھیلتے دیکھتے ہیں تو ان کے حوصلے بلند ہوتے ہیں، ذہنی صحت بہتر ہوتی ہے اور قومی فخر میں اضافہ ہوتا ہے، یہی وہ سافٹ پاور ہے جسے پاکستان کو دنیا کے سامنے پیش کرنا چاہئے۔

انہوں نے پاکستان میں کھیلوں کے فروغ کے لئے بھرپور تعاون کا بھی عزم ظاہر کیا اور کہا کہ میں کھلاڑیوں کی رہنمائی، نفسیاتی تربیت اور ایونٹس کی ترویج سمیت ہر ممکن کردار ادا کرنے کے لئے تیار ہوں تاکہ پاکستان دنیا کے معیار کے مقابلے مسلسل منعقد کرتا رہے۔ چیمپئن شپ میں وزیراعلیٰ پنجاب مریم نواز، وفاقی وزیر داخلہ محسن نقوی اور لیفٹیننٹ جنرل فیاض حسین شاہ سمیت کئی اہم شخصیات نے شرکت کی۔ غیر ملکی کھلاڑیوں نے بھی پاکستان کی مہمان نوازی، سہولتوں اور شاندار ماحول کی دل کھول کر تعریف کی۔