فرانس کا لوور میوزیم ملازمین کی ہڑتال کے باعث بند

پیرس۔16دسمبر (اے پی پی):پیرس میں لوور میوزیم کے ملازمین نے تنخواہوں اور کام کے حالات کے خلاف ہڑتال کی جس کے باعث میوزیم بند رہا۔ العربیہ کے مطابق ہڑتال میں 400 ملازمین نے حصہ لیا،جس کا اعلان ٹریڈ یونین کے نمائندوں نے کیا تھا۔ لوور میوزیم نے اپنی ویب سائٹ پر کہا ہے کہ ہڑتال کی وجہ سے میوزیم فی الحال بند ہے۔ ملازمین بدھ کو ایک جنرل اسمبلی منعقد کریں گے کیونکہ منگل عام طور پر چھٹی کا دن ہوتا ہے۔

یہ ہڑتال اس صورت حال کے بعد ہوئی ہے جسے ٹریڈ یونینز نے کام کے حالات کی تیزی سے بگڑتی ہوئی صورتحال اور عملے کی کمی قرار دیا ہے۔ یونینزنے ہڑتال کے اعلان کے ایک بیان میں وضاحت کی کہ ملازمین مسلسل بڑھتے ہوئے کام کے بوجھ اور متضاد ہدایات کا شکار ہیں جو انہیں اپنے فرائض کو بہترین طریقے سے انجام دینے سے روکتی ہیں۔ یونین ڈیموکریٹیک فرانکیس ڈو ٹراویل کنفیڈریشن جنرال ڈو ٹراویل اور سود یونین نے ایک جنرل اسمبلی کے اختتام پر کہا کہ تقریباً 400 ملازمین نے اتفاق رائے سے ہڑتال کے حق میں ووٹ دیا۔

یونینز کے مطالبات میں مزید مستقل ملازمین کی بھرتی شامل ہے، خاص طور پر سکیورٹی اور وزیٹر سروسز کے شعبوں میں اور کام کے حالات میں بہتری لانے والے شعبوں کے ملازمین کی بھرتی کا مطالبہ کیا گیا۔یہ یونینز یورپی یونین سے باہر کے سیاحوں کے لئے جنوری 2026 کے وسط سے داخلے کے ٹکٹ کی قیمت میں 45 فیصد اضافے کی مخالفت کر رہی ہیں جس کا مقصد تزئین و آرائش کے کاموں کی مالی معاونت کرنا ہے۔ یاد رہے کہ روزانہ تیس ہزار افراد لوور میوزیم دیکھنے آتے ہیں۔