بابائے قوم کی69ویں برسی( آج) عقیدت واحترام سے منائی جائے گی

اسلام آباد ۔ 10 ستمبر (اے پی پی) ملک بھر میں بابائے قوم قائداعظم محمد علی جناح کی69ویں برسی( آج) پیر کے روز عقیدت واحترام سے منائی جائے گی۔مزار قائد پر قرآن خوانی اور فاتحہ کی خصوصی تقریب ہوگی جبکہ زندگی کے مختلف شعبوں سے تعلق رکھنے والے افراد ان کے مزار پر پھول چڑھائیں گے۔بابائے قوم قائد اعظم محمد علی جناح کی 69 ویں برسی کے موقع پر( آج)پیرکو نظریہ پاکستان کونسل کے زیرِاہتمام فیصل مسجد اسلام آباد میں قائد کی روح کے ایصالِ ثواب کیلئے 4:30 بجے سہ پہرقرآن خوانی اور بعد از نمازِ عصر دعائے مغفرت ہوگی جس میں کونسل کی مجلسِ عاملہ کے اراکین کے علاوہ اسلام آباد میں مقیم مسلم ممالک کے سفراء، سفارتی نمائندے، سول سوسائٹی کے اراکین، معزز شہری ، ذرائع ابلاغ کے نمائندے، طلبہ و طالبات اور عوام کثیر تعداد میں شرکت کریں گے۔ اس موقع پر وطنِ عزیز کی سربلندی اور سالمیت کیلئے اجتماعی دعا بھی کی جائے گی۔اسی طرح قائداعظم محمد علی جناح کی برسی کے موقع پر مزید پروگرام بھی ہوں گے۔ریڈیو پاکستان بابائے قوم کو خراج عقیدت پیش کرنے کیلئے خصوصی پروگرام نشر کرے گا۔