وزیراعظم شاہد خاقان عباسی سے پی پی ایم اے کے وفد کی ملاقات

وزیراعظم شاہد خاقان عباسی سے پی پی ایم اے کے وفد کی ملاقات
وفد نے وزیراعظم کو فارما سیوٹیکل کے شعبہ کی کارکردگی اور درپیش مسائل سے آگاہ کیا

اسلام آباد ۔ 11 ستمبر (اے پی پی) وزیراعظم شاہد خاقان عباسی سے پاکستان فارما سیوٹیکل مینوفیکچرنگ ایسوسی ایشن (پی پی ایم اے) کے وفد نے چیئرمین ڈاکٹر شیخ قیصر وحید کی قیادت میں ملاقات کی۔ وفاقی وزیر برائے ہیلتھ سروسز سائرہ افضل تارڑ اور پی پی ایم اے کے عہدیداران بھی ملاقات میں موجود تھے۔ وفد نے وزیراعظم کو فارما سیوٹیکل کے شعبہ کی کارکردگی اور درپیش مسائل سے آگاہ کیا۔ وزیراعظم نے ادویات کی قیمتوں سے متعلق پالیسی پر اظہار خیال کرتے ہوئے زور دیا کہ اس حوالے سے ایک ایسے میکنزم کی ضرورت ہے جس سے ادویات غریب لوگوں کی قوت خرید میں آ سکیں اور یہ فارما سیوٹیکل کے شعبہ کے لئے بھی تجارتی لحاظ سے قابل عمل ہو۔ وزیراعظم نے فارما سیوٹیکل کے شعبہ کے فروغ میں معیار، پیداواریت اور اختراع کی اہمیت کو اجاگر کرتے ہوئے ڈرگ ریگولیٹری اتھارٹی کو ہدایت کی کہ اس حوالے سے موثر پالیسیاں مرتب کی جائیں۔ وزیراعظم نے وزارت نیشنل ہیلتھ سروسز کو ہدایت کی کہ برآمد کنندگان کی سہولت اور پاکستان کی فارما سیوٹیکل مصنوعات کو بین الاقوامی سطح پر قابل قبول بنانے کے سلسلہ میں فارما سیوٹیکل مینوفیکچررز کی جانب سے فارما سیوٹیکل ایکسپورٹ پروموشن کونسل کے قیام کی تجویز پر غور کیا جائے۔ اس موقع پر وزیراعظم کو یقین دہانی کرائی گئی کہ ادویات کی قیمتوں کے حوالے سے عوامی مفاد کا تحفظ یقینی بناتے ہوئے پاکستانی برآمدات کے فروغ میں فارما سیوٹیکل کا شعبہ اہم کردار ادا کرے گا۔