وفاقی وزیر داخلہ احسن اقبال کا سندھ مدرسہ بورڈ (ایس ایم بی) فاطمہ جناح ہائی اسکول کا دورہ، طالبات سے بات چیت

کراچی ۔ 12 ستمبر (اے پی پی) وفاقی وزیر داخلہ احسن اقبال نے سندھ مدرسہ بورڈ (ایس ایم بی) فاطمہ جناح ہائی اسکول کا دورہ کیا۔ اس موقع پر طالبات سے بات چیت کرتے ہوئے انہوں نے کہا کہ تعلیم کے حصول کے بغیر ترقی ممکن نہیں جن قوموں نے تعلیم کو اپنا شعار بنایا وہ دیگر قوموں کو پیچھے چھوڑ چکی ہیں۔ انہوں نے کہا کہ جدید دور میں خواتین کو مردوں کے شانہ بشانہ کام کرنا ہوگا۔ ہماری نوجوان نسل باصلاحیت اور پر عزم ہے۔انہیں صرف مناسب پلیٹ فارم اور رہنمائی کی ضرورت ہے۔ انہوں نے اسکول کے مختلف شعبوں کا دورہ کیا اور طالبات کو اسکول میں دی جانے والی سہولیات پر انتظامیہ کی تعریف کی۔ اس موقع پر ملک کے نامور گلوکار شہزاد رائے نے وفاقی وزیر داخلہ کو بریفنگ دیتے ہوئے بتایا کہ ان کی غیر سرکاری تنظیم "زندگی ٹرسٹ "نے ایس ایم بی فاطمہ جناح ہائی اسکول کو اپنی کفالت میں لیا ہوا ہے اور اس کے تمام اخراجات ٹرسٹ برداسشت کر رہا ہے۔ انہوں نے کہا کہ اس وقت 2500 سے زائد طالبات کو معیاری تعلیم فراہم کی جارہی ہے اور یہاں پر تعلیم کے علاوہ اسپورٹس، ثقافت، آرٹ، ادب اور دیگر شعبوں جن میں وہ دلچسپی لیتی ہیں ان کی رہنمائی کی جارہی ہے۔ انہوں نے کہا کہ ہم کراچی کے دیگر سرکاری اسکولوں کو بھی اپنی کفالت میں لینے کا ارادہ رکھتے ہیں تاکہ نئی نسل کو بہتر انداز میں رہنمائی فراہم کی جاسکے اور انہیں آگے بڑھنے کے مواقع فراہم کئے جا سکیں۔