تین روزہ ایشیا پیس فلم فیسٹیول پاکستان ایڈیشن 2017ءکی افتتاحی تقریب (آج) ہو گی، وزیر مملکت اطلاعات و نشریات مریم اورنگزیب فیسٹیول کا افتتاح کریں گی

اسلام آباد ۔ 12 ستمبر (اے پی پی) پاکستان نیشنل کونسل آف دی آرٹس (پی این سی اے) میں 3 روزہ ایشیا پیس فلم فیسٹیول پاکستان ایڈیشن 2017ءکی افتتاحی تقریب (آج) بدھ کو ہو گی۔ وزیر مملکت اطلاعات و نشریات مریم اورنگزیب فلم فیسٹیول کا باقاعدہ افتتاح کریں گی۔ پی این سی اے منتظمین کے مطابق اس 3 روزہ فلم فیسٹیول میں پاکستان کے علاوہ ایران، کوریا، ملائیشیا، تھائی لینڈ، چین، انڈیا، جاپان، افغانستان اور انڈونیشیا سمیت دیگر ممالک کی فلم پروڈکشن سے تعلق رکھنے والی ٹیمیں آدھے منٹ سے 30 منٹ تک دورانیے کی شارٹ فلمیں پیش کریں گی۔ فیسٹیول میں بہترین شارٹ فلم بنانے والی ٹیم کو انعامات بھی دیئے جائیں گے۔