جینیسس انویٹیشنل گالف، جیکب بریج مین نے روری ڈینیئل میکلرائے کو ہرا کر پہلا پی جی اے ٹور ٹائٹل جیت لیا

لاس اینجلس۔23فروری (اے پی پی):امریکا کے 26 سالہ گالفر جیکب بریج مین نے سنسنی خیز مقابلے کے بعد روری ڈینیئل میکلرائے کو ایک شاٹ سے شکست دے کر لاس اینجلس میں منعقدہ جینیسس انویٹیشنل کا ٹائٹل اپنے نام کر لیا۔

بی بی سی کے مطابق جیکب بریج مین نے مجموعی طور پر 18 انڈر کا سکور کیا اور وہ 1975 کے بعد اس باوقار ٹورنامنٹ میں ڈیبیو پر کامیابی حاصل کرنے والے پہلے کھلاڑی بن گئے ہیں۔ شمالی آئرلینڈ سے تعلق رکھنے والے عالمی نمبرٹو روری ڈینیئل میکلرائے نے آخری روز شاندار کھیل کا مظاہرہ کرتے ہوئے 67 کا کارڈ کھیلا، لیکن وہ مجموعی طور پر 17 انڈر تک ہی پہنچ سکے اور کرٹ کیتایاما کے ساتھ مشترکہ طور پر دوسرے نمبر پر رہے۔

ٹورنامنٹ کے میزبان ٹائیگر ووڈز کی موجودگی میں ہونے والے اس فائنل میں جیکب بریج مین نے اعصاب پر قابو رکھتے ہوئے آخری ہول پر فیصلہ کن پٹ سکور کیا ، جس کے بعد وہ پہلی بار عالمی درجہ بندی میں ٹاپ 25 کھلاڑیوں میں شامل ہو گئے ہیں۔

دوسری جانب عالمی نمبر ون سکاٹی شیفلر 12 ویں نمبر پر رہے، جس کے باعث ان کی مسلسل 18 ٹورنامنٹس میں ٹاپ 10 میں رہنے کی شاندار مہم کا خاتمہ ہو گیا۔ انگلینڈ کے ٹومی فلیٹ وڈ 12 انڈر کے ساتھ ساتویں نمبر پر رہے، جبکہ میکس گریسر مین نے 14 ویں ہول پر ہول ان ون کر کے دن کی سب سے بڑی انفرادی کارکردگی دکھائی۔