رابطہ عالم اسلامی کی جانب سے رمضان المبارک کی مناسبت سے رمضان پیکیج کا آغاز

اسلام آباد۔12مارچ (اے پی پی):رابطہ عالم اسلامی کی جانب سے رمضان المبارک کی مناسبت سے ہر سال کی طرح رمضان پیکیج (افطار صائم ) کا آغاز کر دیا گیا ہےجس کے تحت اس سال 3 ہزار خاندانوں میں رمضان پیکیج تقسیم کیا جائے گا۔ پیکیج میں آٹا ، چینی ، چاول ، دالیں ، کھجور اور دیگر ضروری اشیاء خوردونوش شامل ہیں۔ رمضان پیکیج کی تقسیم رابطہ عالم اسلامی کے سیکرٹری جنرل ڈاکٹر محمد بن عبد الکریم العیسی کی خصوصی دلچسپی کا مظہر ہے جو پاکستان اور پاکستانی عوام کے لئے اپنے دل میں خصوصی محبت رکھتے ہیں۔ انہوں نے پراجیکٹ کے آغاز پر اپنے خصوصی پیغام میں کہا کہ ضرورت مند افراد کی مدد کرنا رابطہ عالم اسلامی کی بنیادی ترجیہات میں شامل ہے اور مستقبل میں بھی اس نوعیت کے منصوبے جاری رکھے جائیں گے۔

رمضان پیکیج کی تقسیم اسلام آباد، پنجاب، خیبر پختو نخوا اور آزاد کشمیر کے مختلف علاقوں میں جاری ہے اور یہ عمل 25 رمضان المبارک 2026 تک جاری رہے گا۔ رمضان پیکیج حاصل کرنے والے مستحقین نے رابطہ عالم اسلامی کی اس کاوش کو سراہتے ہوئے تنظیم کے کنٹری ڈائریکٹر سعد مسعود الحارثی اور ان کے معاونین کے لئے نیک تمناوں کا اظہار کیا ہے۔ مقامی افراد اور سماجی حلقوں نے بھی اس فلاحی اقدام کو قابل تحسین قرارد دیتے ہوئے کہا کہ اس طرح کی سرگرمیاں معاشرتی ہم آہنگی اور باہمی تعاون کے فروغ میں اہم کر دار ادا کرتی ہیں۔