ایبٹ آباد،ریسکیو 1122 کی پولیس کے لیے فرسٹ ایڈ اور فائر سیفٹی ٹریننگ ورکشاپ

ایبٹ آباد۔ 13 مارچ (اے پی پی):ریسکیو 1122 کی جانب سے ایبٹ آباد پولیس کے لیے فرسٹ ایڈ اور فائر سیفٹی ٹریننگ ورکشاپ کا انعقاد ہوا۔ریسکیو 1122 کی ٹریننگ ٹیم کی جانب سے پولیس لائن ایبٹ آباد میں پولیس سٹاف کے لیے فرسٹ ایڈ اور فائر سیفٹی کے موضوع پر خصوصی تربیتی ورکشاپ کا انعقاد کیا گیا۔

ترجمان ریسکیو کے مطابق ایک روزہ تربیتی ورکشاپ ڈسٹرکٹ ایمرجنسی آفیسر حفیظ الرحمان کی ہدایت پر منعقد کی گئی جس میں ٹریننگ ونگ کے انچارج نقاش عالم اور ان کی ٹیم نے پولیس اہلکاروں کو ہنگامی حالات سے نمٹنے کے حوالے سے عملی تربیت فراہم کی۔ورکشاپ کے دوران پولیس اہلکاروں کو ابتدائی طبی امداد فراہم کرنے،زخمی افراد کا خون روکنے،دل اور پھیپھڑوں کے افعال کو بحال کرنے (سی پی آر) اور دیگر ہنگامی طبی اقدامات کے بارے میں آگاہی دی گئی۔

آگ لگنے کی صورت میں بچاؤ اور آگ پر قابو پانے کے طریقوں سے بھی آگاہ کیا گیا۔ریسکیو 1122 کی ٹریننگ ٹیم نے آگ بجھانے اور ہنگامی صورتحال سے نمٹنے کے لیے عملی مشقیں بھی کروائیں جس میں پولیس اہلکاروں نے بھرپور دلچسپی کا مظاہرہ کیا۔اس موقع پر شرکاء کو بتایا گیا کہ کسی بھی ہنگامی صورتحال میں بروقت اور درست ابتدائی امداد قیمتی جانوں کو بچانے میں اہم کردار ادا کرتی ہے۔