حالیہ بارشوں کے بعد ملک بھر میں ڈینگی کے کیسز میں اضافے کا خدشہ ہے، این آئی ایچ

اسلام آباد۔18مارچ (اے پی پی):نیشنل انسٹیٹیوٹ آف ہیلتھ (این آئی ایچ) نے حالیہ بارشوں کے بعد ملک بھر میں ڈینگی کے کیسز میں اضافے کا خدشہ ظاہر کرتے ہوئے صوبائی حکومتوں کو فوری اقدامات کی ہدایت کی ہے تاکہ ممکنہ وبا پر قابو پایا جا سکے۔این آئی ایچ کی جانب سے جاری ہدایات کے مطابق بارشوں اور نمی میں اضافے کے باعث مچھروں کی افزائش کے لیے سازگار ماحول پیدا ہو گیا ہے، خصوصاً شہری علاقوں میں جہاں پانی کھڑا رہتا ہے۔ ادارے نے نشاندہی کی کہ گزشتہ برسوں کے دوران ڈینگی کے کیسز میں مسلسل اضافہ دیکھا گیا ہے۔

صوبائی و ضلعی صحت حکام کو ہدایت کی گئی ہے کہ ڈینگی کی بروقت تشخیص کے نظام کو مؤثر بنایا جائے، مچھر مار مہم کو تیز کیا جائے اور ہسپتالوں میں ہنگامی صورتحال سے نمٹنے کے لیے مکمل تیاری یقینی بنائی جائے۔اعلامیے کے مطابق عوام سے بھی احتیاطی تدابیر اختیار کرنے کی اپیل کی گئی ہے، جن میں لمبی آستین والے کپڑے پہننا، مچھر بھگانے والی ادویات کا استعمال اور گھروں و گردونواح میں پانی جمع نہ ہونے دینا شامل ہے۔

مزید برآں، ہسپتالوں کو ہدایت کی گئی ہے کہ ڈینگی مریضوں کے لیے علیحدہ انتظامات کیے جائیں اور طبی عملے کو ہر ممکن صورتحال سے نمٹنے کے لیے تیار رکھا جائے۔ماہرین کے مطابق احتیاطی تدابیر اور بروقت طبی نگہداشت ہی اس مرض سے بچاؤ کا مؤثر ذریعہ ہیں۔