لیسکو کا عوامی شکایات کے ازالے کے لئے جدید نظام متعارف

لاہور۔3اپریل (اے پی پی):لیسکو کی جانب سے گزشتہ 3ماہ کے دوران عوامی شکایات کے ازالے کے لیے سرکاری پورٹلز کے تازہ ترین اعداد و شمار جاری کر دیے گئے ہیں۔ چیف ایگزیکٹو لیسکو انجینئر محمد رمضان بٹ کی ہدایت پر شکایات کے فوری، بروقت اور موثر ازالے کے طریقہ کار کو مزید بہتر بنانے کے لیے اقدامات مزید تیز کر دیے گئے ہیں۔

مجموعی رپورٹ کے مطابق مختلف پورٹلز پر کل5 لاکھ 46 ہزار763 شکایات موصول ہوئیں، جن میں سے5 لاکھ 42 ہزار353 شکایات کا کامیابی سے بروقت ازالہ کر دیا گیا ہے۔

تفصیلات کے مطابق سی سی ایم ایس پلس پورٹل پر4 لاکھ70 ہزار681 شکایات موصول ہوئیں، جن میں سے4 لاکھ66 ہزار362 کو ریکارڈ مدت میں حل کیا گیا۔ اسی طرح اوپن کچہری، عوامی رابطہ مہم کے تحت 71 ہزار95 درخواستیں موصول ہوئیں، جن پر کارروائی کرتے ہوئے71 ہزار158 شکایات کا موقع پر ازالہ کیا گیا۔پاکستان سٹیزن پورٹل پی ایم ڈی یو کے تحت 2557 شکایات درج ہوئیں، جن میں سے 2403 پر کارروائی مکمل کی جا چکی ہے۔

جبکہ وزارت کا آن لائن پورٹل پر موصول ہونے والی تمام 2430 شکایات کا سو فیصد ازالہ کر دیا گیا ہے۔

لیسکو ترجمان کے مطابق سینٹرل کمپلینٹ سیل اور فیلڈ آپریشنز میں جدید نظام متعارف کروا دیا گیا ہے، جبکہ ڈیجیٹل مانیٹرنگ اور سخت ویلیڈیشن کے ذریعے نظام میں شفافیت کو یقینی بنایا جا رہا ہے۔

سی ای او لیسکو کا کہنا ہے کہ صارفین کو فوری اور بروقت ریلیف کی فراہمی لیسکو کی اولین ترجیح ہے۔ تمام آپریشنل سرکلز کو ہدایت کی گئی ہے کہ وہ شکایات کے حل کو ہر صورت یقینی بنائیں۔ ہم شکایات کے اندراج سے لے کر ان کے حل تک کے پورے نظام کو مزید تیز اور موثر بنا رہے ہیں تاکہ صارفین کو بہترین سروسز میسر آسکیں۔