پنجاب فوڈ اتھارٹی کا صحت دشمن عناصر کے خلاف کریک ڈائون جاری

لاہور۔4اپریل (اے پی پی):پنجاب فوڈ اتھارٹی نے صوبہ بھر میں صحت دشمن عناصر کے خلاف کریک ڈائون تیز کر دیا۔ ڈی جی فوڈ اتھارٹی کی ہدایت پر جاری کارروائیوں کے دوران لاہور میں کارروائیاں عمل میں لائی گئیں۔ ترجمان کے مطابق غازی پھاٹک بائی پاس پر سپلائر گاڑی سے 1300 کلو مردہ مرغیاں برآمد کر کے تلف کر دی گئیں، اس سنگین خلاف ورزی پر مقدمات بھی درج کر لیے گئے ہیں۔

دوسری جانب واہگہ ٹائون میں معروف برانڈز کی جعلی کولڈ ڈرنکس تیار کرنے والا ایک یونٹ بھی پکڑا گیا، جن کے قبضہ سے1920 لیٹر جعلی مشروباتسمیت دیگر سامان ضبط کر لیا گیا، حکام کے مطابق یونٹ میں ملازمین غیر قانونی طور پر معروف برانڈز کے نام پر جعلی مصنوعات تیار کر رہے تھے۔

ڈی جی فوڈ اتھارٹی نے کہا کہ جعلساز مافیا اصل کے نام پر صارفین کو دھوکہ دیتا ہے اور زیادہ منافع کی خاطر انسانی صحت سے کھیلتا ہے، تاہم ایسے عناصر کی پنجاب میں کوئی جگہ نہیں۔ انہوں نے مزید کہا کہ عوام کو معیاری اور محفوظ خوراک کی فراہمی کے لیے دن رات اقدامات جاری ہیں۔