حکومت کے طے شدہ ریٹ کے مطابق خریداری کے عمل میں کسی قسم کی بدعنوانی برداشت نہیں کی جائے گی،ڈپٹی کمشنرچنیوٹ

چنیوٹ۔ 04 اپریل (اے پی پی):ڈپٹی کمشنرچنیوٹ عائشہ رضوان کی زیر صدارت گندم خریداری مہم کے حوالے سے اہم اجلاس منعقد ہوا، جس میں کسانوں، کاشتکاروں اور ہارویسٹر مالکان نے شرکت کی۔اجلاس میں گندم خریداری کے حکومتی اہداف، خریداری مراکز پر سہولیات، باردانہ کی فراہمی اور شفاف عمل کو یقینی بنانے کے اقدامات پر تفصیلی غور کیا گیا۔

ڈپٹی کمشنر نے ڈپٹی ڈائریکٹر زراعت ، فوڈ کنٹرولر و متعلقہ افسران کو ہدایت کی کہ کسانوں کو ہر ممکن سہولیات فراہم کی جائیں اور حکومت کے طے شدہ ریٹ کے مطابق خریداری کے عمل میں کسی قسم کی بدعنوانی مڈل مین کا دخل یا تاخیر برداشت نہیں کی جائے گی۔انہوں نے کہا کہ حکومت کسانوں کی فلاح کے لیے سنجیدہ اقدامات کر رہی ہے اور گندم خریداری مہم کو کامیاب بنانے کے لیے تمام وسائل بروئے کار لائے جائیں گے۔

اجلاس میں کاشتکاروں نے اپنے مسائل اور تجاویز پیش کیں، جن کے فوری حل کی یقین دہانی کروائی گئی۔ڈپٹی کمشنر نے ہارویسٹر مالکان کو بھی ہدایت کی کہ وہ فصل کی بروقت کٹائی کو یقینی بنائیں تاکہ کسانوں کو کسی قسم کی مشکلات کا سامنا نہ کرنا پڑے۔ انہوں ہارویسٹر مالکان کو یقین دلایا کہ پیٹرولیم مصنوعات کی قیمتوں میں حالیہ اضافے کو مد نظر رکھتے ہوئے آپکے ساتھ بھرپور تعاون کیا جائے گا ۔